«Янаулысен Учалыозь пыдын мынӥм»

Лыдӟиськыны яратӥсь песянайлы арлыдыз уг люкеты. «Ошмес», «Янаульские зори» газетъёсты со чидатэк вите. Вылез номер вуытозь, газетъёсты кык пол но лыдӟыса, пе, потэ. «Тодмоос сярысь лыдӟыны уката но тунсыко. Можга гуртысь трос нылпи будэтэм семья сярысь гожъяды», - вера Янаул ёросысь Нократ гуртын улэм песянай. Та дыре со Василий пиеныз но Венера кенэныз Прогресс гуртын улэ. Газетъёсты лыдӟон сяна, Настафия Хайдаровна туала улонын луэм учыръёсын но тунсыкъяське. Выль иворъёсты телевизор, радио пыр тодэ. Быдӟым Атыкай ожвакытэ УкраинаеБашкортостанысь 450 йыр сюро пудо пыдын уллямзы сярысь кино уськыто шуыса кылэмез бере, песянай синвуаськытэк чидамтэ. Та ивор сое куатьтонэтӥ аръёсы берыктэм. Трос иськемъёсы пудо уллянэз со ӟеч тодэ. Егит дыръяз Учалые пыдын ыж улляса нуиллям угось. - Сомында пудоез иськемъёс пыр уллянэз туж секыт, - вера Настафия песянай. – Ӵош ужам эшъёсын 1961-тӥ арын 25-тӥ августын кузь сюресэ потӥм.

Мон соку Буйский совхозын ужасько вал. Милемлы веразы, 400 йыр ыжъёсты ыштытэк Учалые вуттоно шуыса. Ыштонъёстэк луоз шат? Иськемъёсты ортчыса, ыжъёслэн пыдзы быре. Соосты кытчы карод? Куд-огзэ вандыса сиылӥмы, кӧттэ тырытэк азьлане мыныны уг луы угось. Куд-огез выдыса ик кыльылӥзы. Со понна ми кыл кутоно луим, уждунысь коньдонэз басьтыса кельтӥзы. Тыриськонмы одӥг арскын гинэ ӧз быры. Ыж уллясьёс Учалые одӥг толэзь мынӥллям. Сюрес вылэ соку сизьым группа потэм, котькудаз – 400 йыр ыж. - Нюлэсъёс, гурезьёс, шуръёс, изо сюресъёс. Ваньзэ ортчим. Пыдамы – резиналэсь колоша. Пыдпыдэсъёсы лёгъёс потӥзы. Соос ӧз быре ни, али ке но висё, пудо уллям дырез тодэ вайыса, - веранзэ азьланьтэ песянай. – Одӥг толэзь ӵоже куазь пӧртэм луылӥз. Воштыны дӥськутмы ӧй вал. Зор вуэн чай быректытыса юэм дыръёс но луизы.

Эскеронъёс кужмоослы сётӥсько, шуо. Ож аръёсы вордӥськем, жугиськон бере улэм адямиослы улонлэсь вань кузьытсэ-курытсэ веръяно, секытлыкъёсты чидано луэм. Со дыръёсты Настафия Хайдаровна ноку уз вунэты. «Семьямы пичи ӧй вал – куать кузя улӥмы. Анайлэн но, атайлэн но анайзы ми дорын вал, -вера песянай. – Сиён ӧвӧл. Одӥг арлы кык мешок пызь сёто вал. Пушнерен, мукет турын-куарен кӧтмес тыримы. Сисьмем картофка сием дыръёс но луизы. Бакчаез киын гудыса картофка мерттылӥмы». Настафия песянай вазь анайтэк кылем. Солэн уж сюресэз 13 аресаз кутскем - колхозэ ужаны потэм. «Парсь вордон фермаын нырысь ужай. Собере ыж фермаын ужаны кутски. Чипы-курег но ути», - вера Н. Камашева. 1960-тӥ арын солэн аслаз семьяез кылдэм. Вот. Урада гуртын вордскыса будэм нылаш Нократысь Шарифьянлы бызем. Кузпалъёслэн куинь пиоссы вордскиллям. Кожалод, пичи дыръяз шуг-секытъёс пыр потэм адямиез азьпалан курадӟонъёс уз вите ни. Но Настафия песянайлы эшшо одӥг бадӟым эскерон витем. Бусыын кушман октыкузы, со тракторлэн тележкаез улэ пачкам. «Пыд йылам уг султы ни шуыса малпасько вал. Улыны гожтэм на вылэм. Но ужаны потэме ӧз луы ни, тазалыке ляб луэмен группае поттӥзы», - вера Настафия Хайдаровна. Арлыдо песянайлэсь сюлэмзэ тужгес позырто нимысьтыз военной операция сярысь малпанъёсыз. Песянай уй-нунал куриське, ож мед быроз, шаермес утисьёс таза, улэп мед бертозы шуыса.

Туспуктэм вылын: Н. Камашева Венера кенэныз.