Бадӟымъёс но пичиос шахмат доска сьӧрын пумиськизы

Ӵошатсконлэн историез 1996-тӥ арен герӟаськемын. Соку «Социализм» (та дыре «Рассвет СПК») хозяйствоен кивалтӥсь Ханиф Баймиев колхозлэн кубокез понна шахматъя ӵошатсконлэсь положенизэ кутӥз. Соку шахмат доска сьӧрын укмыс команда пумиськиз. Бадӟымъёсын ӵош пиналъёс но шудӥзы. Кубокез Нефтекамскысь команда басьтӥз. Со дырысен Улысь Балтаче арлы быдэ кужмо шахматистъёс люкасько. Зэм, ӵошатсконъёс куспын пӧртэм мугъёсын кӧня вис кароно луиз. Табере сое радъясь но воштӥськиз – бадӟым ужез ас вылаз Улысь Балтач гурт поселение басьтӥз. Шахматэн ӵошатскон Башкортостанысь удмуртъёслэн национально-культурной центрзылэн ужрадъёсыз пӧлы пыртэмын.

Нефтекамскысь куноос туэ но ӵошатсконэ шумпотыса вуизы. Соослэн оштолэзе Улысь Балтачын ортчоно шахматъя ӵошатсконэ пыриськонзы ӟеч сямлы пӧрмиз ни уго. Жаляса верано, туэ отчы мукет городъёсысь но ёросъёсысь шудӥсьёс ӧз вуэ. Соин шахмат доска сьӧрын Нефтекамскысь но Татышлы ёросысь шахматистъёс гинэ пумиськизы. Доска сьӧрын бадӟымъёсын артэ Вылысь Татышлыысь пиналъёс но шудӥзы. Нош Улысь Балтач школаын дышетскисьёс понна нимысьтыз ӵошатскон радъяськиз – соос дышетскон юртазы шудӥзы. Вераны кулэ, татысь нылпиос берло вакытэ спортлэн та видэныз зол эшъяськизы. Уго гурт поселениын «Королевство шахмат» проект быдэстӥське.

Пыр-почгес газетмылэн 16-тӥ оштолэзе потоно номерысьтыз лыдӟыны быгатоды.