"Вордскем шаере понна борддор выллем сыло"

Калтасы ёросысь Бадӟым Качакысь Влада Тимирханова полициын ужасьёслэн формазы шоры пичи дырысеныз синмаськыса учкылӥз. Будэмез бере нылаш одно ик со выллем дӥськутэн ветлоз шуыса малпаз. Зэмзэ но, укмыс классэз йылпумъяса, Влада пичи дырысьтыз льӧль малпанзэ улоназ пыӵатӥз: со Нефтекамскысь машиностроительной колледжысь тылпулэсь утиськонэн герӟаськем ӧрез бырйиз.

Туннэ нуналэ Влада Тимирханова нырысетӥ курсын гинэ дышетске ке но, тылпуэн нюръяськисьёслэсь формазэс данъяськыса нуллэ. «Дышетскыны пырем бере ик ваньмылы нимысьтыз дӥськут басьтыны куризы. Соку шумпотонэлэн пумыз ӧй вал, мылкыдме ватыны быгатытэк, пичи нуны выллем тэтчай. Угось малпанэ быдэсмиз! Со нуналысен дышетскон юртэ мылыськыдысь ветлӥсько», - шудбурен тырмем мылкыдэныз люкиське нылаш.

Владалэн кылъёсызъя, машиностроительной колледжысь тылпулэсь утиськонэн герӟаськем ӧре пырыны солы секыт ӧз лыкты. Угось татын бызьылыны, тэтчаны но спортлэн мукет видъёсызъя быгатонлыкъёсыз возьматыны кулэ вал. Соин школаын спортэн эшъяськись нылашлы дышетскыны пырон экзаменъёс капчиен сётскизы. Сю метре бызьылонын, выж вылысен ӝуткаськонын Влада ассэ учкымон возьматӥз. «Школаын дышетскыкум волейболъя, ӝӧквыл теннисъя , бызьылонъя ӵошатсконъёсын огнам яке командаен котьку ик вормисьёс пӧлын луисько вал. Спортэз гажаны дышетэмез понна Григорий Юлкубаевич Тимирбаевлы, физкультураен дышетӥселы, тау кылъёсме верасько. Со ик юрттӥз улонысьтым льӧль малпанме быдэстыны. Спортэн эшъяськыса, тазалыкме кыдатыса туннэ татын дышетскисько», - вера Влада Тимирханова.

(Пыр-почгес лыдӟыны быгатоды газетмылэн 22-тӥ толшоре потэм номерысьтыз).

Венера ИЛЬБАЕВА.

Автор:Оля Нигаматуллина

Читайте нас

Партнеры