Гуртысь фельдшерской пункт выльдӥське

Котьма но ки понэмез яратэ. Фельдшерской пунктын  тужгес но чылкыт, отчы вуэм калыклы лякыт луыны кулэ. Угось фельдшер доры висисьёс юрттэт курыса лыкто, чебер но чылкыт юртэ пырыса мылкыдзы мед ӝутскоз вылэм.Озьы малпа Бадӟым Качак гуртын кема ӧвӧл ужаны кутскем фельдшер Людмила Меншатова но. Ужан интызэ выльдон сярысь со кема малпаса ветлӥз, ёрос эмъюртлэн кивалтэтэз азьын но со сярысь кыл ӝутӥз. Дыртӥсез ӧз луы. Соку со фельдшерской пунктэз выльдон ужъёс борды ачиз кутскиз. Краскаос но мукет кулэ луись макеосты басьтыса, гуртысьтызы котьма ласянь кибашлы кышномуртлы Светлана Гилязевалы вазиськиз. Соиз ужаны пумит ӧз луы. Тыршись фельдшерлэсь мылкыдзэ шӧдыса, кивалтэтын но юрттыны кыл сётӥзы. Нош озьы гинэ бадӟым ужез вормыны уг луы вылэм. Гуртысьтызы кышомуртъёс фельдшерской пунктын выльдӥськон ужъёс мыно шуыса кылэмзы бере ик асьсэос юрттӥськыны куриськизы. Нылкышноослэн верамзыя, гуртын фельдшертэк секыт лыктэ. Нош Людмила Шарипзяновна гурт калык понна учкымон тырше. Кулэ луиз ке, эмъюм но ачиз шедьтэ, доразы лыктыса уколъёс лэсьтыса кельтэ. Ужзэ яратӥсь фельдшерез Бадӟым Качакын  гажало, солэсь тыршемзэ уг вунэто, ӟечен берыкто.

Туннэ нуналэ борддоръёс но вӧлдэтъёс буямын ини. Ӝоген бӧлетъёс но выжъёс выльдӥськозы. Шумпотымон, кулэ дыръя гурт калык быгатэ огазеяськыны. Угось ӵошен кариськыса ужез капчи вормыны.