Пиослэн вормонэн бертонзылы оске

Частичной мобилизация улэ шедиз Татышлы ёросысь Петропавловкаысь Марат Насибуллин но. Солдат улонэз веръям егит пи выль адӟонзэ кышкатэк пумитаз. «Повестка вуэм бере спецоперацилэсь пегӟыны йырам ик ӧз лыкты. Кызьы вордӥськем улостэ тушмонлэсь уд утьы?» - вера ожгарчи. Частичной мобилизация бере кык арлэсь трос дыр ортчиз ни. Нош тушмон али ке но калыкмылы пумит ыбылэ. Кылем арын сӥзьыл М. Насибуллинэз но соос сӧсыртӥзы, шаермес утись тушмонлэн «Лепесток» минаяз лёгиз. «Морти» позывноен ожгарчи со бере пӧртэм госпитальёсын эмъяськиз. Шумпотоно, егит пи пыд йылаз лёгиз. Сӧсырмем пыдыз дырын-дырын ассэ тодаз вайытэ ке но, ожгарчи – улэп. Туннэ со СВО-ысь ветеранэн лыдъяське. Тазалыкеныз сэрен сое нимысьтыз военной операцилэсь мозмытӥзы.

«Мортиен» пумиськон сярысь трос пол малпаськылӥ. Ожгарчиен та нуналъёсы гинэ пумиськыны кылдӥз. Шӧдӥське, солы нимысьтыз военной операция, отын ӵошен луэм эшъёсыз сярысь вераны капчи ӧвӧл. Трос секытсэ адӟоно луиз солы кык ар куспын, ыштонъёс но ӧжыт ӧй вал. Тодмоосыз но син азяз быризы. «Частичной мобилизация кутскем бере ожмаськыны Казаньын одӥг толэзь ӵоже дышетӥзы. Собере Ростов улосвылысь Миллеровоын одӥг толэзьлы матэ учебкаын луимы на», - вера «Морти». Солэн ож сюресэз 22-тӥ толсуре кутскиз. М. Насибуллин Краснолиманской направление шедиз. Соос Серебрянка гурт но Кременная город куспысь серебрянской лестничествоын оборонаын луизы. Нош кылем арын тулыспал толэзе центральной военной округез быдэсак таратӥзы, отысь пиосты Донецкой народной республикае лэзизы. «Морти» ньыль толэзь ӵоже комендантской службаын вал.  

Нош собере соосты штурмовой батальонъёсы выжтӥзы. «Отчы потэм бере одӥг толэзь дышетӥзы, - тодаз вае М. Насибуллин. – Куинетӥ сентябре штурме кошким. Нырысь Авдеевкае пырим, собере – Селедово пала. Отчы вуыны кык-куинь иськем кылем вал, сӧсырми». Ӵапак соку «Морти» «Лепесток» минае лёгем. «Куара кылӥське шуыса, вылӥе учки. Со куспын пыд улам пуштӥз, - вера со. – Штурмовой группаын куать кузя вал. Тушмон медаз адӟы шуыса, кык-куинь кузя люкиськыса пыримы. Сӧсырмем бере пиос, пыдъёсме биньыса, писпу улэ интыязы. Тушмон, пе, медаз синйылты. Собере Татышлы ёросысь пиен Новожеланное гурт пала вамыштӥм. Солэн киез сӧсырмемын вал. Потыку обстрелэ но шедим». Ожгарчиослы штурмысь потыны кык сутка кулэ луиз.

 Сӧсырмем ожгарчиез Авдеекае келязы. Нош собере со Ясиноватая городысь, Миллеровоысь, Оренбург улосвылысь госпитальёсын эмъяськиз. Шумпотоно, ожгарчилэн пыдыз бурмиз. Озьы ке но солы нимысьтыз военной операцие сюрес пытсаськиз. Эмчиос «Мортилэсь» мукет висёнъёссэ шараязы.

 Нимысьтыз военной операциын Марат Насибуллинлы трос секытэз адӟоно-чидано луиз. Озьы ке но со ноку вормонлы осконзэ ӧз ышты. 2022-тӥ арын куарусён толэзе но тушмон пумитэ таӵе ик малпанэн вамыштӥз. СВО-ысь ветеран дышетскисьёсын пумиськонэ вуылыкуз, котьку вордӥськем шаереныз данъяськемез сярысь вера, калыклы гуманитарной юрттэт келямез понна тау каре. Нош пиналъёс солэн гадь бордаз чилясь «Участник специальной военной операции», «За оборону Кременной», «За освобождение Донбасса» медальёсыз шоры паймыса учко.