Калык ог-огезлы сюлэм куремъя юрттэ

Котькуд адямилэн аслаз улон сюресэз. Кин ке улонтӥ шонер но лякыт вамышъя, кинлы ке янгышоно луэ. «Качак» позывноен ожгарчилы улонын туж ик ӧз удалты. Ас вакытаз семья кылдытӥз ке но, кусыпсы юн ӧз луы. Озьы со улон сюрестӥ огназ вамыштӥз. Пӧртэмдыръёсыз луизы ке но, странамылэн секыт вакытъёсаз пиосмурт вордскем шаермы понна тушмонлы пумит султыны ӧз кышка.

Пиосмуртэ нимысьтыз военной операцие быдэс гуртэн келязы. Со нуналысен коркаезлэн ӧсъёсыз ворсаськизы. Кожалод, кинлы кулэ оген улӥсь пиосмурт: семьяез ӧвӧл, матысьёсыз кыдёкын. Нош паймоно кадь: шаермес утисез огназэ ӧз кельтэ. Нимысьтыз военной операцие мынэмез дырысен «Качаклы» вордӥськем но будэм Уллапал урамын улӥсьёс семьялэсь матысьгес луизы.

Бускелезлэн Антонида Уракбаевалэн Калык ог-огезлы сюлэм куремъя юрттэ кичӧлтэмезъя, одӥг урамын улӥсьёс субботнике люкаськизы: ожгарчилэсь корказэ, солэсь котырзэ тазатӥзы. Быдэс нунал сямен ужазы бускельёс. Нылкышноос ожгарчилэсь корказэ тазатӥзы, миськылӥзы, кулэтэм макеоссэ поттазы. Пиосмуртъёс юрт котырзэ утялтӥзы. Нош Андрей Гильванов аслаз трактореныз жуг-жагез нуллӥз. Писпуосын, куакъёсын будэм юрт огнуналскын выль улонэн шокчиз.

(Пыр-почгес лыдӟыны быгатоды газетмылэн 19-тӥ тулыспалэ потэм номерысьтыз).

Венера ИЛЬБАЕВА.