Вордӥськем юртын котьку шуныт

Солэн вань улон сюресэз яратоно гуртэныз герӟаськемын. Атаймы Татышлы ёросысь Уразгильды гуртын вордӥськемын, татын дышетскемын но ужамын. Туннэ со гажано кузпалыныз, анаенымы Минтифа Арслановнаен, Александр пиезлэн семьяеныз Уразгильдыын улэ.

Татысь паськытэсь урамъёсын шудыса ик ортчиз милям но пичи дырмы. Анай-атаймы милемыз котьку дормес, гурт калыкез, ужез гажаны дышетыса будэтӥзы. Асьсэос но уж пӧлын бергаса улӥзы. Со вакытэ ик вить нылпиоссэс  мусояса будэтыны дыр шедьтӥзы. Нош табере соос 10 внукъёссылэн но 10 правнукъёссылэн яратоно ӵужай-ӵужатайзы, песяй-песяйтайзы луо. Асьмеос но кемалась ни анай-атай ке но, сюлэммы котьку дорамы куриське.  Тодӥськом, отын милемыз,  нылъёссэс, эмеспиоссэс, внукъёссэс но правнукъёссэс котьку возьмало, шуныт пумитало шуыса. Атаймы та нуналъёсы 85 арес тырмон юбилейзэ пусъе. Аръёс дыртыса ортчо ке но, атаймы ми понна котьку егит луэ. Солэн ӟеч мылкыдыз ваньзэ вормыны, азьпала йыгмыт вамышъёсын мыныны юрттэ.Атаймы кема аръёс ӵоже гурты удысын тыршиз: бригадир но вал, агрономын но ужаз, фермаен кивалтӥз. Нош пенсие потэмез бере муш утён борды басьтӥськиз, бадӟым семьямес ческыт чечыен тырмытӥз. 

Туннэ атаймес вордӥськем нуналэныз  ӟечкыланы дыртӥськом. Солы милемыз будэтэмез, шонер сюрес бырйыны юрттэмез, секыт дыръёсы, шумпотыку – котьку вӧзамы луэмез понна тау шуиськом. Атаймы – милям данъяськонмы, шумпотонмы. Солы сӥзиськом ӟеч мылкыд, тыпы кадь юн тазалык, быронтэм кузь даур, тыр улон но шудбур!

Нылпиосыд, внукъёсыд, правнукъёсыд.