+28 °С
Салкым
Общество
15 январь 2025, 05:35
Удмурт калыклэсь осконзэ утись
2013-тӥ арын тодосчиосын ӵош Башкортостанысь удмурт гуртъёсы вöсьёсты эскерыны потӥ. Соку Татышлы ёросысь Бальзюга гуртысь гажано куриськисен Назип Садриевен пумиськимы. Табере сое ӝожомыса тодамы ваиськомы: Назип агай улонысь кошкиз. Со кузь, пайдаё улонзэ удмуртъёс сярысь сюлмаськыса улӥз. Назип Садриев солэн ужез азьланьтӥське, егит вӧсясьёс сое воштӥзы шуыса тодыса улонысь кошкиз.
Назип агай секыт аръёсы улӥз. Егит дыръяз ик юрттӥськись луыса вöсьёсы ветлыны кутскиз. Соин сэбедъёсты умой тодӥз. Уго сям-нергеослы, куриськонъёслы дышетскыны у г яра, соосты «нушканы» кулэ, шуо. Егит воргорон куриськисьёс бордын луыса, вӧсяськон кылъёсты ӵем кылӥз, текстъёс йыраз кылизы. Арлыдо вӧсясьёслэсь мар каремзэс адӟыса улӥз, аръёс ӵоже сое тодаз возиз.
Ож бере гуртъёсын воргоронъёс öжыт вал. Егит ке но, Назип куриськон борды басьтӥськиз. Пумиськыкумы со мадиз, нырысьсэ куриськыкуз, нырысьсэ кияз ӝук возьыкуз, туж возьдаськиз но кышказ шуыса. Быръем сюресаз йыгмыт султыны солы арлыдоос, азьвыл вӧсяськисьёс юрттӥллям. Йылолъёс,сямъёс сярысь юанъёсмылы Назип агай ялан валэктылӥз: «Озьы лэсьтӥзы пересьёс, озьы вераллязы пересьёс». Та инъетъёсты лыдэ басьтыса, Назип агай улӥз, ужаз. Со тылпу кысӥсь но луиз, вал утисьын но тыршиз. Улоназ пумиськись вошъяськонъёс азе кышкатэк вамыштӥз. Огвакытэ куриськонъёсты радъян дугдытэмын вал. Соку но Назип агай Инмарлы осконзэ ӧз ышты, вӧсяськон интыосты вошъяса куриськиз, вӧсь ортчытэмзэс медаз адӟе шуыса.
Зэм , со дыре вӧсе ветлӥсьёслэн лыдзы трослы кулэсмиз. Вӧсьёсты радъянэз но капчи ӧй вал. Со пумысен Назип агайлэн сюлмыз юн висиз. Та югдурез воштон сярысь вӧсясь трос малпаськиз. Озьы, 1980-тӥ арын «Куинь гурт вӧсь» интые кыксэ ортчытыны кенешизы, гурт калыклы мукет валтӥсь вӧсьёсы ветлыны капчигес луоз шуыса. Вӧсь ортчытонэ но Назип агай воштӥськонъёс пыртӥз. Сӥзиськонэз покчиарняе ӝытазе ортчыто вылэм, быдэс уй тылэз утьыны кулэ луэм, медаз кысы шуыса. Назип агай тодӥз, гурт калык понна со укыр бадӟым уж - быдэс уй тылэз утьыны. Табере сӥзиськонэз куриськон радъян нуналэ ӵукна ортчыто.
Назип агай бордысен кутскыса, выль куриськисез быръён но воштӥськиз. Азьло арлыдо воргорон Инмарлы вазиське вал. Назип агай егит дыръяз вöсясь луиз. Соин ик егит вöсясьёс солэсь ужзэ мед азинтозы шуыса сюлмаськиз. Фридман Кабипяновлы 30 арес гинэ вал, Назип агай сое гуртазы вуоно вöсясьлы бырйыкуз.
Назип агай адӟем - чакламезлэсь, тодэм-валамезлэсь дунлыксэ тодӥз . Со aспöртэм но кужмо адям и вал, вакытаз вӧсьлы дурбасьтӥсьтэмъёслы пумит сылыны быгатӥз. Озьы Назип агай удмурт осконэз утиз. Тау дуно ужед понна, Назип агай!
Ева ТУЛУЗ,
Николай АНИСИМОВ,
Лийво НИГЛАС,
Лаур ВАЛЛИКИВИ.
