Пиналъёслэн шумпотонзы пумтэм, соослэн школзы тупатэмын

Школаез усьтон ужрад дасэтӥ толшоре ортчиз. Отчы Башкортостан Республикаысь Кун Собранилэн-Курултайлэн депутатэз Ильшат Вазигатов, Янаул ёрос администрациен кивалтӥсь Салават Гильмиев, Янаул ёросысь дышетонъя управлениен кивалтӥсь Эльвира Шаихова, Вуж Вараш гурт поселенилэн администрациеныз кивалтӥсь Эльза Минликузина, Россиысь Геройлэн Игорь Насибуллинлэн анай-атаез Роза но Леонид Насибуллинъёс, подрядчикъёс но мукетъёс пыриськизы. Салават Назирович тупатъян ужъёслэн радъяськемзы сярысь вакчияк вераз, нылпиослы, дышетӥсьёслы азинсконъёс но выль вормонъёс сӥзиз. Со «РемСтройМонтаж», «Технострой» ООО-ослэсь кивалтӥсьёссэс Байрам Гадировез но Илгам Ахмадиевез таукаронэн пусйиз. - Туннэ асьмелэн вунонтэм праздник. Школамы тупатон ужъёс бере тодмантэм воштӥськиз. Со табере туала куронъёслы тупа. Дышетон юртын нылпиослы тодон-валан басьтыны вань луонлыкъёс кылдытэмын, - вераз школаен кивалтӥсь Вероника Галлямшина. - Пиналъёслэн шумпотонзы пумтэм, соослэн школазы тупатэмын на. - Башкортостан Республикалэн тӧроезлэн Радий Хабировлэн куремезъя школаын бадӟым тупатӥськон ужъёс 2024-тӥ арысь куартолэзе кутскизы. Со улсын классъёс, коридоръёс, спортзал, пищеблок, санузел тупатъямын, укноос но липетъёс воштэмын.

Со сяна, Вероника Мензаировна аслаз но школаысь коллективлэн нимыныз бадӟым ужез быдэстыны юрттэмзы понна Роза но Леонид Насибуллинъёслы, Башкортостан Республикалэн тӧроезлы Р. Хабировлы, С. Гильмиевлы, Э. Шаиховалы, «Колхоз Восток» СПК-лэн кивалтӥсезлы О. Зайнуллинлы, Э. Минликузиналы, Б. Гадировлы, И. Ахмадиевлы но анай-атайёслы тау кылъёссэ вераз.

Вуж Варашысь школаен кема аръёс ӵоже Владимир Асатов кивалтӥз. Али солэсь ужзэ Вероника Галлямшина азинтэ. Туннэ нуналэ школаын 47 пиналъёс тодон-валан басьто. Дышетскисьёс пӧртэм удысъёсын вормонъёсынызы шумпотто. Соосты ёросын, республикаын, регионъёс куспын ортчись ужрадъёсысь пумитаны луэ. Та школаын ик тодон-валан басьтӥзы Россилэн Героез Игорь Насибуллин, чечен ожын бырыны шедем Эмиль Насибуллин. Дышетскон юртын соослы сӥзем борддор но вань. Ужрадын Олег Зайнуллин школалы Игорь Насибуллинлэсь нимзэ сётыны ӵектӥз.

Та нунал шумпотон мылкыдын тырмемын вал. Ужрадэз кырӟан-эктонъёсынызы, кылбур чуръёсынызы шулдыртӥзы школаын дышетскись пиналъёс. Со сяна, школаын пӧртэм мастер-классъёс но радъяськизы.