Нимысьтыз военной операциын Башкортостанысь журналист быриз

Нимысьтыз военной операцие со ачиз мылкыд карыса кошкиз: кылем арын 30-тӥ октябре Обороная министерствоен контракт гожтӥз, штурмовой ротае шедиз.

Винер Фларисович ужъя эшъёсыныз 12-тӥ ноябре вераськиз.  «Ӝоген оже пыромы», - шуиз со. Нош кык нунал ортчыса, Винер  Фларисович вераз: «Вормом!» Таӵе кылъёсын со люкиськиз ужъя эшъёсыныз, матысьёсыныз...

Винер Зиганшин вордӥськемын Бурай ёросысь Гумар гуртын. «Победа» газетын со 1997-тӥ арысен  ужаз. Нырысь корреспондент вал. Нош 2016-тӥ арын сое редакторе юнматӥзы. Винер Зиганшин – Башкортостанысь но Россиысь Журналистъёслэн союззылэн ёзчиез. Солэн чуръёсыз лыдӟисьёссэ шумпоттӥзы, малпаськытӥзы. Азьланяз но соос В. Зиганшинлэн чуръёсыз борды выльысь но выльысь берытскылозы на.