Кунгожсьӧр кылъёсъя тодон-валан сётэ

- Дышетӥсь луон мылкыды пичиысен кылдӥз. Песятае но дышетӥсь вал, - вера Альмира Борисовна. - Мон Вылысь Татышлыын вордскемын. Кыкетӥ номеро школаын тодон-валан басьтӥ. Мыным тужгес но кылъёсъя урокъёс кельшо вал. Шумпотыса тодэ ваисько ӟуч кылъя но литературая, англи кылъя урокъёсты. Та предметъёсъя Клара Байгазина но Клара Касимова дышетӥзы. Соослэн урокъёссы тунсыко но пуштросо ортчылӥзы. Школаез йылпумъяме бере, дышетсконме Уфаысь башкир кун пединститутын азинтӥ. Отын кунгожсьӧр кылъёсъя факультетын тодон-валан басьтӥ.
Альмира Борисовналэн ужан сюресэз Татышлы ёросысь Уразгильдыысь школаын кутскем. Татын со англи кылэз дышетэм сяна, ӟуч кылъя урокъёсты но нуэм. Нош 1995-тӥ арысен А. Баймиева Улысь Балтач школаын тырше. «Ужаны кутскон аръёсы урокъёсын ватсаса тодон-валан сётон материалъёс шедьтыны шуггес луиз. Нош али та пумысен шугъяськонэз ӧвӧл ни», - вера дышетӥсь.
Альмира Борисовна котькуд нылпилы саклык висъяны, дышетсконын юрттыны тырше. Соос анай кылзэс, ӟуч кылэз тодэм сяна, кунгожсьӧр кылъёсты но мед тодозы шуыса сюлмаське. Дышетӥсьлэсь удысаз быгатыса тыршемзэ нылпиослэн олимпиадаосын, конкурсъёсын утэм вормонъёссы возьмато. Кылсярысь, 2022-2023-тӥ дышетскон арын англи кылъя ёрос олимпиадаын Ранис Шакиров но Арина Баймиева призёръёс луизы. Со арын ик гагаринской олимпиадаын англи кылъя кужымзэс эскеризы Даниель Туктамышев, Даниил Байситов. Нош 2022-тӥ арын ортчем англи кылъя лыдӟисьёслэн «Рождественские встречи» ёрос фестиваль-конкурсазы Дарина Кайранова, Алексей Адуллин но Вероника Саяфарова призёръёс луизы. Со сяна, Альмира Борисовна шумпотыса вера, дышетэм нылпиосыз пӧлысь даслэсь тросэз асьсэлэсь вуонозэс кунгожсьӧр кылъёсын герӟазы шуыса.
Альмира Баймиева - удыссэ валась, бадӟым опытэн дышетӥсь. Солэсь сюлмысь тыршемзэ Татышлы ёрос администрацилэн но Башкортостанысь Дышетонъя министерстволэн Данъян грамотаосыз но яркыт возьмато.