Калыклэн тазалыкез сярысь сюлмаське

«Бигиней шор ёзо школаез йылпумъяме бере, эшеным Чайковскийысь медициная колледже дышетскыны пыри, - быръем удысэз пумысен вера Игорь Владимирович. – Отын одӥг ар тодон-валан люкаме бере армие басьтӥзы. Одӥг ар служить карыса, дышетсконме выльысь азинтӥ». Озьы пияш вордӥськем палъёсаз егит ӧнерчиен бырытскем. Туннэ ну­налэ Игорь Зидияров Бигиней, Бальзюга но Утар-Елга гуртъё­сысь калыклэн тазалыкез ся­рысь сюлмаське. Солэн участо­каз 338 адями лыдъяське. Соос пӧлысь куинез одӥг арессы тыр­мымтэ нылпиос. Нош 60 арес но солэсь бадӟымъёс сюлэсь тросгес лыдъясько. Фельдшер пичиослы но, мӧйыослы но огкадь саклык висъя. Соослэсь тазалыксэс эскерыса улэ. Игорь Владимировичлэн верамезъя, арлыдоос пӧлын вирзӥбетэн курадӟисьёс тросгес. Нош му­кет висёнъёсты дыраз шараян понна, со калыклы диспансери­зация ортчыны ӵектэ. «Ньыль­дон ареслэсь бадӟымъёслы арлы быдэ диспансеризация ортчоно, - шуэ со. – Таза луон понна спортэн эшъяськоно, ӟеч сиськоно. Мынам котькуд адямиез тазаен адӟеме потэ. Туннэ гурт калыклы но ёрос эмъюртысь кивалтэтлы тау кылъёс верасько. Соос котьку юрттыны дась. Ӵошен ужаны капчи».

Фельдшер дыраз привив­ка пуктон, калыклы тазалыко улонэн эшъяськон мылкыд пыӵатон сярысь сюлмаське. Игорь Зидияров спортэз пи­налысен гажа. Со волейболэн шудэ, капчи атлетикаен, куасэн эшъяське. Вылысь Татышлы­ысь эмъюртлэн командаеныз пӧртэм ӵошатсконъёсы пырись­ке. Отын трос дыръя вормисьёс пӧлын луэ.

Игорь Зидияров удысаз усто ужась, нош дораз - яратоно кузпал, атай но пи. Почтальо­нын тыршись Мария кузпалыз, ньылетӥ классын дышетскись Карина нылыз но анаен атаез сое уж дурысьтыз котьку шум­потыса пумитало. Соос ӵошен шутэтско, юртъер котырысь ужъёссэс быдэсъяло.