Геройлэн анаез - Герой

Жаляса верано, пиезлэн, Игорь Насибуллинлэн, улон сюресэз кузь ӧз луы. Тушмон пуля солэсь али гинэ пушйыса сяськаяськись егит улонзэ пыраклы чигиз. Игорь Насибуллин – Россилэн Героез, солэн нимыз странамылэн историяз пыраклы пыремын. Анай сюлэмез гинэ уз шунты со данлык, уз куасьты тылэн ӝуатӥсь синвуосты. Нылпи кошке ке дунне вылысь, соин ӵош анай сюлэмлэн люкетыз куасьме, сюсьтыл выллем ӝуаса быре.
Игорь Насибуллин пичиысен военной луон сярысь малпаськиз. Оло атаезлэсь но агаезлэсь адӟем карыса, оло аслаз сюлэмыз куремъя, нырысь Кемеровоысь радиоэлектроникая кадетской корпусэз йылпумъяз, берло Казаньысь танковой командной Краснознамённой вылӥ училищеысь лейтенант луыса потӥз. «Игорь Казаньын дышетсконзэ быдтыкуз, мон капитан вал ини. Нош атаймы Леонид Гыльмиярович Насибуллин майорозь вуиз. Соку выны кыл сётӥз: одно ик майорозь вуоно но ортчытоно. Со котьку данъяськиз семьямылэсь военной династизэ азинтӥськом шуыса», - тодаз вае Геройлэн агаез Александр Насибуллин.
2022-тӥ арысь тулыспалэ нимысьтыз военной операция кутскиз. Со вакытэ Игорь Насибуллин Белгород улосвылысь Солоти гуртын танковой роталэн командирез луыса службазэ нуэ вал. «19-тӥ тулыспалэ соосты бусые учение поттӥзы. Соку но кышкыт югдур кутскоз шуыса ӧй малпа. Мон ук кузпалэным кытын гинэ ӧй луы, кӧня учениосты адӟи. Йырам ноку ӧз лыкты, вордэм пие зэмос оже шедёз шуыса. Нош 24-тӥ тулыспалэ ӵукна ньыль часын Игорьлэн ротаез нырысетӥосыз пӧлын Донецке пыриз. Со нуналэ пие телефонам жингыртӥз но витетӥ южтолэзёзь ышиз», - синвуоссэ кутыны быгатытэк вера Роза Хабибзяновна. 

(Пыр-почгес лыдӟыны быгатоды газетмылэн 49-тӥ номерысьтыз).