Улон закон вылын гинэ уг возиськы

Кивалтӥсьлэн кабинетэзлэн ӧсэз юн ворсамын ке но, вань вераськемзы телевизорын сямен кылӥське. Шӧдӥське, кышномурт пӧсекъя, куаразэ будэтэ. Нош соин воргорон тышкаське. Солэн зӧк куараез кык аресъем ошлэн кадь кылӥське. Ачим но шӧдытэк, соослэсь вераськемзэс кылзӥськыны кутски.

Иван пересь анайзэ утьыны шуыса гуртэ бертэм. Сое утемез понна коньдон басьтыны документ но лэсьтэм. Пиосмуртлы умой валэктӥсез луэм, лэся: та выллем ужез кунмы вылӥ дунъя, пенсие потон азьын талэсь умойзэ, пе, уд шедьты. Толзэ воргорон гань-гань потэм, лымы сузян сяна уж ӧвӧл угось. Нош гужем вуэмен, Иван егит атас выллем пештырскем: бакчаез утёно, юрт котырез жуг-жаглэсь утялтоно, ульчаез турнано, чебер тус пыртоно. Соку пиосмуртлэн йыраз малпан лыктэм: анаез трос аръёс ӵоже тыршыса ужысь ветеран ним басьтэм. Табере ужась адямилы кунмы, пе, мед юрттоз. Пиосмуртлэн кылъёсызъя, интыысь аскивалтэт ульчаез жуг-жаглэсь утялтыны кулэ, кулэтэм турынэз быдтыны, сиён-юонэн но юрттыны. Та выллем ужен вырыны Иванлэн вакытэз ӧвӧл. Со уйен-нуналэн гуртысьтызы шур дурын визнанэн пуке.

Огвакытэ кивалтӥсьлэн ӧсэз вӧл-вӧл усьтӥськиз. Отысь кык метр ӝуждалаен, шкафлы укшась мугорен воргорон потӥз, нош сьӧраз восьтэт, пичи мугоръем кышномурт - гурт поселенилэн администрациеныз кивалтӥсь - вамыштӥз. Таӵе суредэз адӟыса, серекъяны но, бӧрдыны но паймод. Таза, кужмо, егит пиосмурт кышномуртэ ульчазэ турнаны куре, прокуратураен кышкатэ. Шузимемын шат асьмелэн туала улонмы? Администрацилэн ӧнерчиезлэн кылъёсызъя, туннэ нуналэ соослэн контораязы кивалтӥсенызы кыкназы гинэ ужало. Кин меда утялтыны кулэ таза воргоронлэсь юрт котырысьтыз жуг-жагзэ? Одӥг часлы матэ кышномуртэн тышкаськем интые, Иван кӧня ужзэ быдэстыны быгатэ вал. Мар луэм калыкен? Малы адями ог-огезлы уродъяськыса, ог[1]огеныз тышкаськыса улэ? Яке калыкмы дасезлы дышемын? Номыр ужатэк, чик вырӟылытэк, кизэ гинэ вӧлъяса улыны дась. Юрт котыред чебер луиз ке, аслыд но учкыны шулдыр. Куддыр улонмы закон вылын гинэ уг возиськы, трос дыръя адямилэн ог-огеныз тупаса улэмез законлэсь бадӟымгес но, кужмогес но луэ.

Муш Анай.