Семьяын нылпи ке трос, шумпотон но пумтэм

Шаерамы трос нылпиосын анайёслы бадӟым саклык висъяське. Республикаын но соосты данъяса трос пӧртэм ужрадъёс ортчыло. Одӥгаз таӵе республика ужрадэ Янаул ёросысь Можга гуртысь вить нылпиослэн анайзылы Клара Ахметовалы но вуылыны шуд усиз. Сое 2004-тӥ арысь 4-тӥ толсуре «Анаймурт дан» медален пусйизы.
Клара Сабировна Шудек гуртысь трос нылпиен семьяын вордӥськемын. Школаез йылпумъяса, дышетсконзэ Сарапулысь педучилищеын азинтэм. Ужан сюрессэ со Шудекысь нылпи садын кутскем. «Пӧртэм удысын тырши. Можгаысь школаын покчи классъёсты дышетӥ. Собере гуртысьтымы скал вордон фермае вамыштӥ. Отын скал кыскисьын тырши. Ферма ворсаськем бере, Янаулысь спецшколаын воспитательын пенсие потытозь ужай», - уж сюресэныз тодматыса вера Клара Сабировна. Туннэ нуналэ со Рамус кузпалыныз но Анастасия внучкаеныз ӵош улэ. Рамус Сабирович Байгузиноысь пекарняын водительын тырше. Солэсь азьвыл со электрикын, тылпу кысӥсьын ужам. Нош Шудек школаын тямысэтӥ классын дышетскись Настяез пӧртэм ужрадъёсысь, ӵошатсконъёсысь пумитаны луэ. Нылаш спортэн эшъяське: волейболэн, баскетболэн шудэ, куас вылэ но кышкатэк султэ. Нош гужем со «Усточикар» лагерьын шутэтске. Туэ но отысь аслыз трос эшъёс шедьтэм.
Ахметов кузпалъёслэн нылпиоссы асьсэлэн семьяосынызы уло ни. «Вить нылпиосмы ке вал, табере соос дас луизы, - вера Клара Сабировна. - Милям дас куинь внукъёсмы но внучкаосмы. Тужгес пичиезлы - Ясминалы – вить толэзь луиз».
- Ваньмы ӵошен гужем гинэ люкаськиськом. Соку мӧзмыны дыр уг луы ни, - вераськонамы итӥське Рамус Сабирович. – Нылпиосмы дорамы кемагес вуытэк уло ке, ми соослэсь бертэмзэс чидатэк возьмаськом.
Ахметовъёс трос пудо вордо, чипы-курегъёс утялто. Соин кузпалъёслэн Янаулын улӥсь Азат но Алмаз пиоссы анай-атайзылэн воштонтэм юрттӥсьёссы луо. Гужем соос атай юртазы ӵем вуо. Соос мушъёсты учкыны, пудоослы турын дасяны юртто. «Пичи пимы тракторен турна, бадӟымез машинае тырыса нуллэ, - шумпотыса вера анаймурт. – Со сяна, Азат мушъёсты утьыны юрттэ, тупатъяськон ужъёсын выре». Рамус Сабирович ваньмон дырзэ муш умортоос лэсьтонлы, техниказэ тупатъянлы висъя. Клара Сабировна керттӥськыны, пыжиськыны яратэ. Нылпиоссэ со котьку ческыт пыжиськемъёсын пумита. Вордскем гуртсылэсь та дыре палэнын улӥсь Алсу, Алия но Айгуль нылъёссы но анайзылэн пӧрам-пыжиськемъёсызлэсь мӧзмыса берто.