Азьпалан бадӟым ӵошатсконъёс витё

Та ласянь ужзэс азинтыны РФ-лэн президент грантъёсъя фондаз келям проектсы юрттэ. Туэ «Центр развития сельского поселения Нижнебалтачевский сельсовет «Надежда» огазеяськон грант басьтӥз. Со нылпиосты шахматэн шудыны дышетонлы сӥземын вал. Табере соосын арнялы быдэ Татышлы ёрослэн шахматъя чемпионэз Елена Шафеева ужа.

Со пиналъёсты, арессэс лыдэ басьтыса, кык группалы люкиз. Пичиос та вакытэ шахмат сярысь валанзэс гинэ будэто ке, бадӟымъёс пӧртэм ӵошатсконъёсын но кужымзэс эскеро ни. Нылпиослы, кивалтӥсьсылы та ласянь бадӟым юрттэт возьмато анай-атайёс. Гуртын соос пӧлын но шахматэн тунсыкъяськисьёс ӧжыт ӧвӧл угось. Та проект улсын котькуд группаысь нылпиослы 32 урок сётыны чакламын. Урокъёс одӥг час кыстӥсько. Соослэсь ӟечлыксэс ӝутыны выль шахматъёс но доскаос, шахмат часъёс, видеопроектор юртто. Нылпиос котькуд уроке шумпотыса вуо. Тыршемзылэн емышез но шӧдӥське ни. Дышетскисьёслэн ёрос спартакиадаязы Улысь Балтачысь школаын дышетскисьёс кыкетӥ интыын луизы. Татысь куатез пиналъёс Аскиное «Газпромтрансгаз Уфа» ООО-ен радъям ӵошатсконэ вуылӥзы. Отын 2014-2017-тӥ аръёсы вордӥськем нылпиос пӧлын Кристина Губаева кыкетӥ интыын луиз. Нош коньывуон толэзе со ёросысь дышетскисьёс пӧлын шахматъя первенствоын нырысетӥ интыын луиз, Ева Гильмаутдинова куинетӥ интыен бертӥз.

«Кристина Губаева шахмат доска сьӧрын шӧдскымон вормонъёс басьтӥз ни, - вера Елена Петровна.  – Со Татышлы ёрослэн огазеям командаеныз ӵош Агидельын ортчем «Башкирская шахматная лига» турнирын «Север» группалэн отборочной этапаз пыриськиз. Кристина 2015-тӥ арын но со бере вордӥськем нылъёс пӧлын шудӥз. Отын котькуд шудӥсь сизьым очко басьтыны быгатэ вал. Кристиналэн со 4,5 луиз. Та шумпотымон лыдпус. Табере Шахматъя федерацилэсь Кристиналэсь рейтингзэ учкемзэ витиськом».

Ёросысь шахматъя чемпионлэн кылъёсызъя, котькуд удысын бадӟым вормон басьтыны луэ дышетӥсь, дышетскись но анай-атай ог-огзэс валаса ужало ке. Спортын но пӧртэм ӧвӧл: бадӟым вормон басьтон понна тренерлы соосын валче ужано. Елена Петровналы Улысь Балтачысь нылпиосын удалтӥз, пинал шахматистъёс нуналысь нуналэ трос выль тодон-валан басьтыны тыршо. Уго азьпалан соосты бадӟым ӵошатсконъёс витё. «Королевство шахмат» проект шахматъя ёрос чемпионъёсты В. Ш. Шайдуллинэз но Б. Ш. Шакировез буре ваён ӵошатсконэн йылпумъяськоз.