Шудбурлы оскид ке, со тыныд одно ик пальпотоз

Лотерея выллем билетъёсты телефон пыр нимысьтыз сайтэ юнматыса, тужгес шудоосыз бырйисьёс квартиралы, машиналы но мукет дуно кузьымъёслы кузё луизы. Куарусёнэ ортчем быръёнъёсын но «Рахмат-2024» акция ужзэ азинтӥз. Тулыс сямен ик, татын куинь квартира, одӥг машина, ньыль квадроцикл, семьяен шутэтскыны Сочие путёвка но мукет кузьымъёс шудытӥзы.

Удмурт гуртъёсысь куаразэс сётӥсьёс но «Рахмат-2024» акцие мылысь-кыдысь пыриськизы. Лотереялы оскисез трос ӧй вал ке но, ваньзы билетъёссэс сайтэ юнматӥзы. Калтасы ёросысь Бадӟым Туганеевоысь Радислав Идарисович Минлиханов та выллем «шудонъёслы» туж уг оскы. Озьы ке но сётэм билетлы пумит ӧз луы, нош сое сайтэ пыртыны оло вунэтӥз, оло мылкыдыз ӧз луы. Ӝоген воргорон уж дураз мынӥз. Вахта амалэн ужась бурильщиклэн билетэз озьы ик кисыяз кыльысал, кузпалызлэн тодаз ке ӧй лыктысал. Ляйсан Рангилевна шудо билетэз сайтэ юнматӥз. Кышномурт оло шӧдӥз вормонзэс? Кузпалызлы жингыртыса вераз: «Рахмат-2024» акциын вормид шуизы ке, эн, паймы». Соку но Радислав Идарисович киыныз гинэ шонтӥз. Дас куинетӥ куарусёнэ уйин ужаса пырем воргоронэз телефон жингыртэм паймытӥз. Мошенникъёс жингырто, дыр, шуыса, телефонзэ басьтыны ӧз дырты, нош квадроцикллы кузё луэмез сярысь вуэм смс-ивор Радислав Минлихановез шудо кариз. Со соку ик кузпалызлы но матысьёсызлы жингыртыса, ӟеч иворзэ вераз.

 - Кин солы оскоз, быръёнэ вуыса, таӵе бадӟым кузьымлы кузё луод шуыса. Шудбурлы оскыны кулэ вылэм, улон шумпоттыны быгатэ, - малпанъёсыныз люкиське Радислав Идарисович.

Табере пиосмуртлы семьяеныз кыре потаны, эшъёсыныз чорыганы ветлыны квадроцикл туж умой луиз. Вормонэз понна Радислав Минлиханов «Рахмат-2024» акциез радъясьёслы тау кылъёссэ вера. Азьпалан но со, быръёнъёсы пыриськыса, та выллем акциосын шудбурзэ утчаны малпа. Солэн малпамезъя, улон шоры шумпотыса учкид ке, со тыныд одно ик пальпотоз.