Бизнес-шерифез Башкортостан Республикалэн тӧроезлэн Таукаронэныз пусйизы

 Вить ар куспын республикаын 13 сюрслэсь трос предпринимательской часъёс ортчытэмын, 20 сюрслэсь трос проектъёс эскеремын. Солэн 50 процентлэсь тросэз улонэ пыӵатэмын. Та дыр куспын 26 сюрслэсь трос выль уж интыос кылдытэмын. 13-тӥ ноябре со сярысь БР-лэн тӧроез Радий Хабиров ивортӥз. Та нуналэ со Россилэн Героезлэсь Максим Серафимовлэсь нимзэ нуллӥсь «Патриот» военно-патриотической паркын бизнес-шерифъёсын пумиськылӥз. Татын соос пӧртэм ужпумъёсты сэрттӥзы-пертчизы. Пумиськонын Радий Хабиров устооссэ бизнес-шерифъёсты пӧртэм данъетъёсын пусйиз. Шумпотымон, та нуналэ Татышлы ёросысь бизнес-шерифез Е. Ф. Хакимьяноваез но данъязы. Солы Башкортостан Республикалэн тӧроезлэсь Таукаронзэ сётӥзы.

 Башкортостанысь бизнес-шерифлэн туспуктэмез:

- бизнес-шерифъёслэн 49 процентэз нылкышноос луо;

- бизнес-шерифъёслэн 50 процентэз 50 ареслэсь бадӟым, 12 процентэз – 55 ареслэсь;

- тужгес егит бизнес-шерифъёс Аскино, Благовещенск, Кармаскалы, Стерлибаш, Уфа ёросъёсын, Кумертауын уло (27-35 арес);

- бизнес-шерифъёслэн 50 процентэзлэн кык яке солэсь тросгес вылӥ тодон-валанзы.