Кибашлыос чебересь ужъёсынызы паймытӥзы

Учкисьёс, кылсярысь, паймыса учкизы Удмурт Элькунысь вуэм Надежда но Дмитрий Рябчиковъёслэсь ужъёссэс. Адӟытонэ соос пӧртэм дӥськутъёсын дӥсятэм мунёоссэс, удмурт шӧмо сумкаоссэс, кутам кутъёссэс, пулэсь лэсьтэм арбериоссэс но трос мукетсэ дасяллям. Пӧртэм киужъёсын вырем сяна, кузпалъёс мушъёссы котырын берганы но дыр шедьто. Со сяна, соос асьсэ удысъёссылы пиналъёсты но дышето, школаосын мастер-классъёс, пе, ортчытъяськом. 

Палэнэгес интыяськемын республикаысьтымы Мишкино ёросысь Тимуршинъёслэн адӟытонзы. Соослэн ӝӧк вылысьтызы сурсвуосын, варенняосын, губиосын банкаосты адӟыса йырыд поромоз. Нош кӧня эмъюм турын-куар соос дасяны вутскиллям! Та нуналэ Лия но Анатолий Тимуршинъёс вань мылкыд карисьёсты сурсвуэн но сектазы, ческыт чаен но куноязы. Со сяна, соос кызьпу туй вылэ пӧрмытэм чебересь суредъёсынызы паймытӥзы. Со – семьялэн йырызлэн тунсыкъяськонэз. Нош Лия юрт котыраз чебересь сяськаос будэтэ. «Сюлэсь ятыр соос мынам, - данъяськыса вера кузё кышно. – Ваньмаз вутскыны тыршиськом. Узы-боры но бичаськом, губияськом но…»

Куинетӥез адӟытон Пермь шаерысь Чернушка ёросысь куноосын дасямын. Ашшаысь Галина но Владислав Шарафутдиновъёслэн семьязы пулэсь лэсьтэм арбериоссэс конкурсэ ваиллям. Владислав кемалась пуэз «улӟытон» бордын тырше. Берло аръёсы та удыслы со шӧдскымон тросгес дырзэ висъя. Со пулэсь чебер ӧс но пӧрмытоз, валесэз, ӝӧк-пуконъёсыз но синмаськымон пӧрмозы. Зэм, та нуналэ соосты конкурсэ вуттыны ӧз пӧрмы, егит семья пичиесь киужъёссэс гинэ сьӧразы кутӥз. Шумпотымон, адӟытонын Кирилл пизылэн но трос ужъёсыз возьматэмын вал. Со пул вылэ ӝуатыса чебересь сяськаос кылдытэм, аспӧртэм пазл лэсьтэм но мукет.