Фестиваль-конкурс финн-угор семьяосты огазеялоз

Калтасы ёросэ, кылсярысь, фольклор коллективъёс люкаськозы. Нош Татышлы ёрос республикаысьтымы но солэн палэнысьтыз финн-угор семьяосты огинэ люкалоз. Тямысэтӥ шуркынмонэ Вылысь Татышлыысь культура юртын «Моя семья – моя крепость» конкурс ортчоз. Сое радъясьёслэн кылъёссыя, конкурс  финн-угор семьяослэсь анай кылзэс, лулчеберетсэс, сям-йылолъёссэс утьыны быгатэмзэс возьматоз.

- Конкурсэ котькуд мылкыд карись семья пыриськыны быгатоз, - шуэ Татышлы ёросысь культурая управлениен кивалтӥсь Руслан Ахметов. – Соослы одӥг курон гинэ пуктӥське: анай-атай конкурсэ одно ик одӥг яке солэсь тросгес пиналыныз вуыны кулэ. Нылпиослэсь арессэс уз чаклалэ.

Фестиваль-конкурс куинь пӧртэм номинациосъя радъяськоз: «Семейное творчество», «Семейное ремесло», «Семейные традиции и ценности». Положениен пыр-почгес тодматскыны луоз газетмылэн сайтэз яке вотэз бамъёсыз пыр.

Конкурсэз радъясьёс ужрадэ мордва, пор, удмурт но мукет семьяосты шумпотыса витё. Со сяна оско на, та нуналэ залын зэмос эшъяськон мылкыд кузёяськоз шуыса. Фестиваль-конкурс 11 часын кутскоз но быдэс нунал ӵоже кыстӥськоз. Со шулдыр гала-концертэн йылпумъяськоз.

Ольга Нигаматуллина.