Пиослы кужым сёто гожтэтъёс, браслетъёс, амулетъёс…

Нылпиослэн СВО-е лэзьыны дасям гожтэтъёссы сярысь газетмылэн сайтаз но гожъяськом. Одӥгзэ сыӵе заметкаез лыдӟыса, тодмое малпанзэ вераз. Нылпиослэн СВО-е лэзем гожтэтъёссы сярысь, пе, гожъяськоды. «Мукет тема ӧвӧл шат? Пиналъёслэн гожтэтъёссы, лэсьтэм «шудонъёссы» кинлы кулэ войнаын? Ӟуч кылын вераса, пустяк, бесполезный презент» - шуиз со.

Тодмоеным мон соглаш ӧвӧл. Гумконвой люканэ одӥг шапык но юрттэтсэ понымтэ адями, сайкыт малпанъёсын гожтэм гожтэтъёсты кулэтэмен лыдъя. Гумконвой пумысен но тодмоелэн аслаз малпанэз. СВО-е лэзьыны со коньдонзэ уг сёты, юрттэтмы коньдон люкасьёслэн кисыоссы дорозь гинэ, пе, вуэ. Нош ожгарчиос озьы уг малпало. Гожтэтъёс шаермес утисьёслы кужым, ӟечезлы оскон, пе, сёто. Со сярысь верало СВО-ын луэмъёс. Нимысьтыз военной операцие пыриськисьёсын пумиськыкум, гумконвой сярысь одно ик вераськиськом. Соос пусъё, дорысьёслэсь юрттэтсэс шӧдӥськом шуыса.

Одӥгаз командировкаын нимысьтыз военной операцие пыриськисен пумиськи. Макем шумпотыса вераз соку Артур Акбулат школаын дышетскисьёслэсь гожтэтъёссэс басьтэмзы сярысь. Соос пӧлын экеезлэн но гожтэтэз вань вал. Артур соосты сьӧраз ваем. «Аслам дышетскем школаысь пиналъёслэсь гожтэтъёссэс басьтон тужгес бадӟым шумпотон луиз. Соос ваньзэ умойзэ сӥзё, вормонэн бертэммес витё. Пиналъёслэсь гожтэтъёссэс сьӧрам ваи. Соослы одно ик возьмато, гожтэтъёсты вуизы шуыса верало. Собере гожтэтъёссэс сьӧрам ик нуо. Дор палась гожтэтъёс мылкыдэз ӝуто, ӟечезлы оскон сёто», - шуиз соку Артур.

Мукетыз ожгарчи но нылпиослэн гожэтъёссы сюлэмез шунто шуыса вераз. Эдик передовойе ӵем пота. Вить нуналзэ отын ортчытыса, со пӧртэм секытлыкъёсын пумиськоно луэ. «Куддыръя ЛБС-ысь (авт. - линия боевого соприкосновения) катьтэм кыльыса, усем мылкыдын потӥськод. Боевой заданиез быдэстыку ож лудэ эшъёсыд, тодмоосыд кулыса кылё ке, соку туж секыт луэ. Сыӵе дыръя кужым сёто матысь адямиос: передовойысь потэмлы быдэ нырысь ик анайлы жингыртӥсько, - вера шаермес утись. – Нош сыӵе дыръя кие шеде ке школаысь пиналлэн ыстэм гожтэтэз, улэп кылемедлы шумпотӥськод. Кырыж, куддыр валантэм почеркен гожтэм чуръёс – «Солдат, мон тыныд оскисько. Тон кужмо, кышкасьтэм, тон одно ик тушмонэз вормод! Бадӟым тау тыныд ваньмыз понна! Кематэк Вормон тӥ киын луоз!» - кужым сёто. Адямилы моральной юрттэт туж кулэ угось».

Тазьы малпало, дыр, тросэз ожгарчиос. Нош ож лудын луытэк, шаермес утисьёслэсь адӟемзэс ас вылад веръятэк, войнае ыстэм гожтэтъёслэн пуштроссы номырин уг юртто шуон – со юнме шорысь вераськон. Тодмое пыӵал кутыса тушмонлы пумит султысал ке, со валасал, дор палась вуэм гожтэтъёс, браслетъёс, амулетъёс талисман выллем луо шуыса. Оло, быронлэсь но утё, дыр.