Гуртысь калыкен артэ вамыштэ

Со 2019-тӥ арысен трос ныпъетэз ас вылаз кышкатэк басьтӥз. Ралия Ришатовнаез соку гуртысьтызы клубазы культорганизаторе юнматӥзы, бӧрысь Ямады гурт поселенилэн Кенешаз депутатэ бырйизы. Со сяна, со Башкортостанысь удмуртъёслэн национально-культурной центрзылэн Кенешезлэн ёзчиез луэ.

 Ралия Ришатовналэн культура удысэ вуэмез шӧдтэк шорысь луиз. Татын со кема аръёс ӵоже клубенызы кивалтӥсез Гузалия Губаеваез воштӥз. Ралия Гафиуллиналэн ужаны кутсконэз сӥзьылэ тупаз. «Нырысетӥез бадӟымез ужрадэ Арлыдоослэн нуналэнызы герӟаськемын луиз, - ортчем аръёссэ тодаз вайыса вера со. – Клубамы шуныт пумиськон ортчытӥмы». Со дырысен Ралия Ришатовна «Зангари» вокально-фольклорной ансамбле ветлӥсь нылкышноосын но ӟеч кусып тупатӥз. Зэм, соос азьвыл но ог-огзылы мурт ӧй вал, анаез Фируза Каспутдиновна кемалась ансамбльын кырӟа-эктэ вал угось. Соин нылкышноос солэн кенэзлэн быгатонлыкез сярысь тодытэк ӧз улэ. Ралия Ришатовна ужаны кутскем бере «Зангари» репертуарзэ но выльдыны тыршиз, калык нимзэ но утьыны быгатӥз. Ёросазы но, удмурт огазеяськонлэн ужрадъёсаз но соосты котьку шумпотыса пумитало. «Ансамблямы 13 адями пыриське. Соос пӧлысь тросэзлы 60-65 арес. Нош Хасима апайлы (авт.- Марданова) 71 арес луиз ини», - вера Ралия Ришатовна. Нылкышноос культорганизаторлэн, депутатлэн зэмос юрттӥсьёсыз но, визь-кенеш сётӥсьёсыз но луо.

Кылемзэ лыдӟыны быгатоды газетмылэн 2-тӥ октябре потэм номерысьтыз.