Дышетскись ӧжыт ке но, вормонъёс трос

Куамын ар ӵоже Леонид Салихзяновичлэн уж дураз трос воштӥськонъёс луиллям. Соос пӧлысь куд-огез дышетӥсез пумтэм шумпоттэ, нош мукетъёсыз малпаськонэ уськыто. Берло аръёсы, кылсярысь, гуртысь школаосын нылпиослэн лыдзы шӧдскымон кулэсме. Математикаез, ӟуч кылэз дышетон ласянь солэн шуг-секытэз сокем бадӟым ӧвӧл ке, физкультурая урокъёсын со секыт ужпум кылдытэ. Котькуд нылпи спортсменэн уг вордӥськы угось.  Соин волейбол яке баскетбол команда люкан ласянь шугъяськонъёс луо. Озьы ке но Вуж Вараш школаын спортэн эшъяськон йылол азинтӥське. Татысь нылпиос ёрос ӵошатсконъёсын ӵемысь вормисьёс пӧлы пыро. Соослы волейболъя «Серебрянный мяч» но баскетболъя «Оранжевый мяч» ӵошатсконъёсын но удалтэ. Татысь командаос отын кыкетӥ но куинетӥ интыосын луо.

Вераны кулэ, Вуж Вараш школаын бадӟым саклык висъяське Гагаринлэн кубокез понна олимпиадае пыриськонлы. Шумпотымон, отын вормонъёссы но ӧжыт ӧвӧл. Туэ, кылсярысь, Ярослав Асатов солэн республика этапаз вормисьёс пӧлын луиз. «Нылпиос урокъёсын тазалыксэс кыдатэменызы гинэ уг буйгатско, тросэз переменаосын но спортзалэ бызьыса вуо. Урокъёс бере тупен шудӥсьёс, куасэн бызьылӥсьёс вань», - вера Леонид Салихзянович. Татын капчи атлетикалы но бадӟым саклык висъяське. Пичиысен спортлэн пӧртэм видъёсыныз эшъяськемзы ик юрттӥз татысь пиослы Игорь Насибуллинлы, Кирилл Шакирзяновлы военнойлэсь сюрессэ бырйыны. Нош Евгений Галиманов дышетӥсез сямен ик Чайкоскийысь физкультурая институын дышетскиз.

Леонид Салихзянович школаын ОБЖ урокъёсты но нуэ. Вераны кулэ, солэн дышетэм пиналъёсызлэн татын но вормонъёсыз ӧжыт ӧвӧл. Соос пӧлысь кӧняез ке сярысь верано ке, пусйытэк кельтыны уг луы  Полина Мингараевалэсь но Дарья Галлямшиналэсь быдэс Россиысь дышетскисьёслэн олимпиадазылэн ёрос этапаз вормисьёс пӧлын луэмзэс. П. Мингараева солэн республика этапаз но шедиз.

Вуж Вараш школаысь физкультурая дышетӥсь пичиысен спортэз гажаса будӥз. Табере Леонид Салихзянович сыӵе мылкыд пыӵатыны тырше пиналъёсызлы но. Шумпотоно, школаын тазалыко улонэн, спортэн эшъяськем нылпиос будыса но ӟеч сямъёсынызы уг люкисько. Татысь пиослэн волейбол командазы, кылсярысь, аръёс ӵоже ни ёросазы одӥгез кужмоез луэ. Со Башкортостанысь удмуртъёслэн национально-культурной центрзылэн волейболъя ӵошатсконаз но зол кужыменыз паймытэ. Отын шудӥсьёс пӧлысь тросэз - Леонид Салихзяновичлэн дышетэм пиналъёсыз.