Башкортостан чебер инкуазеныз узыр

Та кылъёсты Башкортостан Республикаын вордскем но будэм адямиос гинэ уз вералэ, угось асьмелэн регионмылы Россиысь гинэ ӧвӧл, мукет странаысь туристъёс но синмасько. Озьы кылдэмын, республикамы тужгес но чебер интыосыныз, ческыт чечыеныз, инбаме пыкиськись гурезьёсыныз но синучкон выллем чылкыт шуръёсыныз узыр.

 Башкортостан Республикаын туризмлэн нырысетӥ юн вамышъёсыз 1935-тӥ арын лэсьтэмын вал. Соку туризмъя но экскурсияя огазеяськонлэн Башкириысь ёзэтэз Уфае туристъёслы нимысьтыз инты усьтӥз. Со арын ик нырысетӥ экскурсия радъямын вал: Вилюмсонлэн воинской частьысьтыз солдатъёс Оренбург улосвылысь Тоцк городысен Уфаозь пыдын лыктӥзы. Аспӧртэм экскурсие воинской частьысь кивалтэтлэн кузпалъёссы но пыриськизы. Со вакытэ ик соос Уфалэсь но со котырысь интыослэсь чеберзэ пусйизы.

1960-тӥ арын шаеренымы СССР-ысь туристъёс тодматскизы. Та аре Белорецк ёросысь «Арский камень» турбазаын Россия Федерациысь туристъёслэн кыкетӥ слётсы ортчиз. Ужрадэ ваньзэ 60 командаосысь 1500 адями пыриськиз.

Туннэ нуналэ Башкортостан Республика Приволжск федерал округын туризмез азинтонъя кыкетӥ интыын луэ, Россия Федерациын - 12-тӥ интыын. Кылем арын шаермес учкыны 1,6 млн адями вуылӥз, нош туризмен сэрен республикамы 11,6 млрд манетлы узырмиз.

Туэ Башкириен тодматскыны Удмуртиысь тодмое вуылӥз. Надежда Имполитоваен университетын дышетскыкум общежитиысь одӥг комнатаын улӥм. Со но мон кадь ик Удмурт кун университетысь журналистика факультетэз йылпумъяз. Надя котьку котыр ласянь тунсыко адями вал. Кытысь но мар тодӥз ке, одно ик сое ачиз шедьтоз, адӟоз, веръялоз. Берло солэсь мадемзэ ымез усьтыса кылзомы вал.

Кема ӧвӧл Надя интернет вотэсэ Башкирие вуылэмез сярысь гожтэмзэ интыяз, туспуктэмъёсыз но туж тунсыкоесь пӧрмиллям. Та ласянь солы гожтоно кариськи. Кыӵе меда асьмелэн шаермы мукет регионын вордскем но будэм адямилэн синмыныз учкыса?

Юанлы валэктон шедьтыны быгатоды газетмылэн 2-тӥ октябре потэм номерысьтыз.