Ужез капчи ӧвӧл ке но, со - сюлэмызъя

Наташа Хаерзаманова 20 ар ӵоже «Победа» ООО-ын ужаз. Нош табере со «Агрофирма «Урада» ООО-лэн одӥгез кужмоез скал кыскисез луэ. Татчы со ньылетӥ арзэ ветлэ. «Уж нуналэ ӵукна вить часын кутске, - вера со. – Соку гуртамы вахтовой автобус вуэ. Азьвыл Тат. Урадае ужаны гуртысьтымы вить кузя ветлӥськомы вал. Али огнам гинэ кыли на». Наташа Валериевналэн ужзэ гажамез котькуд кылыз бордын шӧдӥське. Удысэз капчи ӧвӧл ке но, со – сюлэмызъя. Скал кыскисьлэсь тыршемзэ кивалтэт но шӧдытэк уг улы. Со трос пӧртэм Данъян грамотаослэн кузёез луэ. Соос пӧлын утиське Россия Федерациысь Гурт хозяйствоя министерствоен сётэмез но. Со сяна, кагазъёсыз пӧлын «Женщина – мать нации» республика конкурслэн финалистэзлэн дипломез но вань. Отчы со 2019-тӥ арын пыриськем.

Вераны кулэ, Н. Хаерзаманова скал кыскисьёс пӧлын радъяськись конкурсэ но трос пол пыриськылӥз ни. Бӧрысь Янаул ёросысь тужгес устоез скал кыскись Чекмагушын (нырысетӥ интыен бертӥз), Стерлитамакын, Кугарчинын (кыкетӥ интыын луиз) республика конкурсъёсын быгатонлыксэ возьматӥз. Сюлмысь тыршемез юнме ӧз луы, со быдэс республикаысь усто скал кыскисьёс пӧлын луиз. Наташа Хаерзамановалэсь ужзэ хозяйствоязы но, ёросазы но вылӥ дунъяло ке но, со понна улонын тужгес бадӟым вормон луэ шудо семьяез. Наташа но Айрат Хаерзамановъёс куинь нылпи  будэтӥзы. Соос анай-атай доры ӵемысь бертыло, юрт котырысьтызы ужъёссэс быдэстыны юртто. Гуртын ужлэн йылыз-пумыз ӧвӧл угось. Наташа Валериевналэн трос дырыз пудоос котырын ортче. Озьы ке но нылкышнолы соос ноку уг акыльто, Хаерзамановъёс доразы но скал, ош, парсь вордо, чипы-курег басьтыны тыршо.