Кин со дроппер, яке кызьы утиськоно пӧяськисьёслэн куриказы шедёнлэсь

Кызьы пӧяськисьёс дроппер утчало

Нырысь пӧяськисьёс адямиослы капчи коньдон поттон пумысен вераны жингырто:  Со понна дышетскем но, быгатонлык но кулэ ӧвӧл: банк карта яке онлайн банк гинэ мед луоз. Пӧяськисьёс сьӧд уж борды нылпиосты но, арлыдоосты но кыскыны быгато. Соин ноку вунэтоно ӧвӧл: пӧяськисьёслэн кыл вылазы - вӧй, кыл улазы - йӧ. Соослэн куриказы шедёнлэсь утиськон понна, тодмотэм адямиосын телефонэн трос вераськоно ӧвӧл. Банк картае тодмотэм адямиослэсь коньдон пыриз ке но, сое кинлы ке выжтыны дыртоно ӧвӧл. Таӵе ӟеч уж лэсьтыны курыса вазиськизы ке, банкен герӟаськоно.

Малы кышкыт дроппер луыны?

Пӧяськисьёслэн куриказы шедем адями коньдонзэ утчаса полицие вазиськиз ке, нырысь дропперез янгыше уськытозы. Зэмос пӧяськисьёс пытьыоссэс ӝог вато угось. Полиция но банк янгышам адямиез дропперъёслэн огъя базаязы пыртозы. Соку солэсь картазэ но, онлайн-банксэ но пытсалозы. Нош коньдонзэ банклэн офисъёсысьтыз гинэ басьтыны быгатоз.

Таӵе кышкытлыклэсь утиськон понна тодмотэм адямиослы коньдон выжтонлэсь чаклаське, соослы онлайн банкады пырыны луонлык эн сётэ.  Нылпиостылы 14 арес тырмиз ке но, соослэн ӟечлыксы сярысь эн вунэтэ. Пиналъёстэс коньдонзэс утьыны дышетэ.