Пиналъёсты шахматэн шудыны дышетозы

«Аръёс ӵоже ӵошатскон трос гуртоосмес бордаз кыскиз ни. Зэм, отчы тросгес бадӟымъёс пырисько. Соин шахмат доска сьӧры пиналъёсты но пуктэм потэ», - вера гурт поселенилэн администрациеныз кивалтӥсь Эдуард Рахимзянов. Дыр вуиз азьпала вамыштыны: туэ РФ-лэн президент грантъёсъя фондаз «Королевство шахмат» проект келямын вал. «Надежда» огазеяськонлэн малпанэзлы быдэсмыны кылдӥз – проект вормисьёс пӧлын луиз. Со вуоно арысь оштолэзь пумозь быдэстӥськоз.

Улысь Балтач школаын туннэ нуналэ 127 пинал дышетске. Проект бордын ужакузы, соос пӧлын нимысьтыз юалляськон ортчытӥзы. Соку тодмо луиз, татысь 79 нылпилэн шахматэн шудыны мылкыдыз вань шуыса. Проектэ 7-18 аресъем пиналъёсты но егитъёсты кутозы. Зэм, нырысь соос пӧлысь 30 усто шудӥсьёсты быръёно луоз. Бӧрысь соосын Татышлы ёрослэн шахматъя туала чемпионэз Елена Шафеева ужалоз. Со пиналъёсын арняяз одӥг пол пумиськылоз но соосын кык час ӵоже ужалоз. Кивалтӥсь но дышетскись ужзэс кутскизы ни. Солэсь ӟечлыксэ ӝутон понна шахмат, шахмат час, видеопроектор но мукетсэ басьтыны чакламын. Шахматэн шудыны дышетскисьёсты берло сертификатэн шумпоттозы.

Проект бадӟым ужрадэн йылпумъяськоз. Тулыс котькуд мылкыд карись «Шах и мат» ӵошатсконэ пыриськыны быгатоз. Со котьку сямен дано гуртоооссэс буре вайыса радъяськоз. «Малпанъёсмы бадӟымесь, - вера Эдуард Бурханович.  – Шахматэн шудыны мылкыд карисьёсмы трос. Соос пӧлысь куамын пиналлэсь быгатонлыксэ волятыны тыршомы. Азьланяз соос ёросын гинэ ӧвӧл, солэн палэназ но бадӟым ӵошатсконъёсы пыриськыны мед быгатозы. Нош шахматъя спортивной разряд басьтыны быгатысал ке, пумтэм шумпотысалмы».