Йырыз изе на, нош ымыз усьтӥське

Ваня гинэ переменаосы классысьтыз уг поты. Эшъёсыз жуась юртысь выллем бызьыса кошко ке, пияш парта вылэ йырзэ поныса мур лулӟылэ. Огтолэзь сямен ини Ваня ассэ тазьы возе. Дышетӥсез Анна Григорьевна нырысь номыр ӧз вазьылы. Мар гинэ уз луы эшъёс куспын: оло кыллы мыныны шедьтӥллям, нош таиз нырзэ ошем, оло пряник-кампет люкыны быгатӥллямтэ. Пичи дыръя ук йыркуръяськем ӝог ортче, нылпиослэн куспазы пырыны уг яра.

Нош али Ванялэн мылкыдыз воксё усемын. Пияш дышетсконын но ассэ лябгес возьматыны кутскиз. Эшъёсыз вӧзы воксё уг мыны. Нылъёслэн но пиослэн ӵошен вераськемзы шоры вожмаськыса выллем учке.

Туннэ Анна Григорьевна вазьытэк ӧз чида.

- Ванечка, малы тон нош ик огнад пукиськод? Тӥни ук эшъёсыд бызьыло, шудо. Перемена шутэтскыны малпамын, султытэк пукыса улыны уг яра.

Дышетӥсьлэн кылъёсыз пичи пилэсь сотэк но висись пушсэ вырӟытӥзы, лэся. Со викышъяса бӧрдыны ӧдъяз. Анна Григорьевна ачиз пичи нуны сямен паймиз. Куинетӥ классозь вуизы ини нылпиос, Ванялэсь бӧрдэмзэ ноку но адӟемез ӧй вал на. Трос дыръя со ачиз эшъёссэ синкылиозь вуттоз вал, нош берло дыре воштӥзы, лэся, сое.

Анна Григорьевна бӧрдӥсь нылпиез олокызьы но нуныяны выриз. Шуныт, небыт кылъёс Ваняез ӧз ворме. Школае анайзэ вазёно луиз.

Ванялэсь анайзэ школаын гинэ ӧвӧл, быдэс гуртын тодо. Калыкын со кадь кышномуртъёс сярысь тазьы верало: йырыз изе на, нош умыз усьтӥське ини. Зэмзэ но Клава малпаськыса уг улы, вань малпанъёссэ вера. Нош адямиез кылъёсыныз вӧсь каре шуыса со уг малпаськы.

Тани али но дышетскон юртэ пырыкуз ик кесяськыны кутскиз. Номыр но, пе, нылпилы сётыны уд быгатӥське, нош шораз кесяськыса бӧрдытыны йырды тырме.

Анна Григорьевна соку воксё паймиз. Со ук Ванялы умойзэ лэсьтыны малпа вал. Ньыльдон арлы матэ школаын ужа ини, ноку но нылпи шоры кесяськемез ӧвӧл на. Пичильтокъёсты угось тышкаськыса уд вормы, соослы шуныт кыл кулэ.

Клава пизэ пуконысь ӝутӥз но адӟыты шуэ кин, пе, тонэ жугиз. Нош соиз пичи коӵышпи сямен кышкась синъёсын анаез шоры учке. Кышномурт пиезлэсь мылкыдзэ валатэк сое сэзъяса тышкаське. Уроке вуэм нылпиос Ванялэсь анайзэ адӟыса «пештырскизы». Клава соос борды но кутскиз.

- Семён, нош ик тон-а Ваняез жугид? Вера мыным малы со бӧрдэ. Вунэтӥд-а тынад велосипедэд понна Ваня кизэ вӧсь кариз, али но биняса нуллэ на висись интызэ.

Бызьылыса горд-горд луэм Семён кыллы кисыяз ӧз пыралля.

- Ваня вӧзы ми сю метре но ум мынӥське. Сое нокин но ӧз йӧты. Ми соин табере ум но шудӥське.

Таӵе кылъёсты кылыса, Клава эшшо но юнгес кесяськыны ӧдъяз. Али ик, пе, Ваняен шудэ, пӧлады пыртэ. Пиме мултэс кариды ке, кытчы кулэ верало, тӥледыз мар карыны тодо.

Соку Анна Григорьевна валаз малы Ваня огназ кыле. Пичи пилэн дунне вылысь тужгес но матысь адямиез солэсь улонзэ сӧриз. Оло кӧня ке вакытлы, оло пыраклы. Нылпиезлэн эшъёсыныз кусыпсы быремын. Кесяськыса но кышкатыса Ванялэн эшъёсыз соин шудыны уз дыртэ. Нокин уз тоды, уз вала мар али Ванялэн пушдуннеяз. Пичи нылпилэн сюлэмаз анаез каллен вень бышка, нош солэсь вӧсь луэмзэ чик уг шӧды.

МушАнай.