Сюлэм шунытэз котькинлы тырме

Янаул ёросысь Шудек гуртысь Марина Шайдуллина но та удысын тырше, Янаулысь «Альтаир» социальной юрттэт возьматонъя центрын ужа. Солэн утёно арлыдоосыз 14 кузя. «Куинез Можга гуртын уло, кыкез – Коньгаын, укмысэз - Шудекын», - вера Марина Галимзяновна. Бускель гуртъёсысь арлыдоос доры кышномурт велосипедэн ветлэ. Нош зоро нуналъёсы, толалтэ нялтас машинаос шедё, куддыр сюресъёсты пыдын но ортчоно луэ.

Та ужаз М. Шайдуллина кема уг ужа ке но, утёно адямиосызлэн сюлэмазы сюрес со ӝог шедьтэм. Соослэсь но, гуртоосызлэсь но Марина Галимзяновна сярысь ӟеч кылъёссэс гинэ кылод. «Маринамы котьку юрттыны дась. Небыт кылзэ уг жаля. Солэн шуныт кылъёсызлэсь мылкыд ик ӝутске, йӧнатскыса кылиське кадь. Бадӟым тау солы», - вера Шудекысь Алевтина Соломенко.

Марина Галимзяновналэн утёно адямиосызлы сӥзем тетрадьёсыз вань. Со отчы ку лыктылэмзэ гожтэ, кыӵе уж быдэстэмзэ пусъе. Солэн лэсьтоно ужъёсыз трос угось. Огезлы магазинысь сиён-юон басьтыса ваёно, мукетызлэсь дӥськутсэ, тусьты-пуньызэ, корка-корказьзэ миськоно, куинетӥезлэн бакчаез утялтоно но мукет. Марина апай номырлы уг ӝожтӥськы, дырзэ со быгатыса висъя, котькудӥз доры вуылыны тырше.

Азьло М. Шайдуллина Янаулысь почта ёзэтын ужам, гожтӥськонъя ёзэтын 25 ар ӵоже тыршем. «Гуртэ корка ӝутэммы потӥз. Семьяенымы Шудеке выжим. Янаулэ ветлыса ужанэз капчи ӧвӧл. Соин ужме воштоно кариськи. Нырысь гурт хозяйствое скал кыскыны интыяськи. Гуртысь ферма быремен, социальной ужась луи», - вера кышномурт.

Социальной ужасьёс – бадӟым сюлэмо, кылкутӥсь адямиос. Юрттэт возьмась адямиослы соос кужымзэс, дырзэс висъяны котьку дась. Соослэн шунытлыксы котькинлы тырме. «Утёно адямиосы матысьёсы кадь дуно пото. Ӵукна султыса но, изьыны выдыку но соос сярысь малпаськисько. Соос но монэ чидатэк витё. Одӥг-кык нунал куспын ӧд вуы ке, соос жингырто, юаллясько, малы уд лыктӥськы шуыса, - вера Марина Шайдуллина. - Тросэзлы арлыдоослы вераськыны адями кулэ. Соос шумпотэмзэс но, сюлмаськонъёссэс но мыным верало». Марина Галимзяновна утёно адямиос понна эш но, юрттӥськись но, куддыр психолог но, эмчи но луэ. «Солэн лэсьтэм ӟеч ужъёсыз лыдъяса быдтонтэм», - вера А. Соломенко.