Ог-огзэс валаса, ог-огзылы юрттыса уло

Кузпалъёс ватытэк верало, туннэ нуналэ но ог-огзы понна кенеш сётӥсь, юрттӥсь но тужгес матысь адямиос луо шуыса.

- Улонын пӧртэм дыръёс луо. Шудо адямиос но секытлыкъёсын пумиськыло. Соосты вормон понна ог-огдэ валаса улоно, - шуэ Салима Шагиевна.

Салима апай Янаул ёросысь Вылысь Барабановка гуртын вордӥськыса будэмын. «Ас шудме Арлянысь шедьтыны гожтэм вылэм», - шуэ со.  

Васинкин кузпалъёс куать нылпи будэтӥзы. «Ми но семьяямы куать нылпи будӥм. Ӵошен шулдыр но, капчи но улонын, - шуэ Раиф агай. Та дыре нылпиосмы асьсэлэн семьяосынызы уло». Арлыдо кузпалъёсты 11 внукъёссы, правнуксы шумпотто ни. «Нылпиосмы ӵем бертыло. Ваньмы огазе ке люкаськиськом, туж шумпотӥсько», - шуэ Салима апай.

Васинкинъёс гумыразы ужлэсь кышкатэк тыршизы. Соослэн ужан аръёссы гурт удыслы сӥземын. Раиф Каспатович Мичурин нимо колхозын ветеринарын тыршем. Салима апай нырысь парсь фермаын ужам, берло - колхозын бакча сиён будэтӥсьын.

- Колхозмы трос кубиста будэтэ вал. Со сяна, кияр, помидор мерттылӥмы, – вера Салима Шагиевна. – Кубиста асьмеос кизиськом вал. Мерттэм бере кылемзэ узьымез ужасьёслы, калыклы сётъяллямы. Кубистае киськаны ву шурысь карнанэн вайылӥмы. Ужмы секыт шуыса ноку ӧм ӝожтӥське. Нуналъёсмы уж дурын ортчылӥзы. Ужысь бертыса, пудоез но сюдоно, вулы но ветлоно, нылпиосмы но пичиесь… Нылпиослэсь будэмзэс но адӟытэк кылим, шуыны луоз. Яра, Раифлэн анаез вӧзамы вал. Со утялтӥз пиналъёсмес.  

Кузпалъёс вакытаз пудо трос вордӥллям. «Вал, куинь скал, ыжъёс, азбар тыр тылобурдо утим. Турын дасян сярысь кӧня сюлмаськоно луылӥз», - вера Раиф агай. Туннэ но кузпалъёс ужтэк пукыны уг чидало. Парсь, курег вордо, гужемлы ӵӧж басьто. «Бакча бертӥ ик шур бызе, нош азбарын, урамын - вож-вож ожо. Гуртамы тылобурдо утьыны каньыл», – шуо соос.

Шулдыр гужем нуналъёссэс Васинкинъёс кырын ортчыто: узы-боры, эмъюм турын, губи бичало, веник дасяло. Толалтэ юртъер котырысьтызы ужъёссэс ӵош быдэсъяло. Соос котьку ог-огзылы оскыса, ог-огзэс валаса улыны тыршо. Со бордын ик, вылды, шудо семья луыса улонлэн секретэз.