Ваче ки вамышъясьёс ог-огзылы пыкет мед луозы

Янаул ёросысь Сандугач гуртысь Тамара но Галимьян Гареевъёслэн корказы доры вуыку, улмопуоссы син азям йӧтӥзы. Кыӵе чебер луэ, дыр, татын писпуос сяськаяськыку шуыса, ас поннам малпай. Азбарын дас одӥг улмопу (соосты лыдъятэк ӧй чида) ӵошен сяська усьтӥзы ке, паймымон дунне кылдэ, дыр. Гареевъёслэн улонзы но сяська кадь вылэм. Али ке но арысь аре улон сяськазы ялан чебергес но ческытгес зыно луэ. Тамара но Галимьян Гареевъёс Барабановка школаын одӥг классын дышетскизы. Норканысь егит пи Сандугачысь мусо ныллы син понӥз. Нош мылкыдзэ усьтыны соку ӧз дӥсьты. Озьы ке но улон сюрестӥ ӵошен вамыштон сярысь малпанзэ сюлэмаз возиз. Школаез йылпумъяса, Галимьян Фатихович Ижевскысь сельскохозяйственной институтэ дышетскыны пыриз. Нош Тамара Яковлевналы со ласянь ӧз удалты. «Мон анай-атайме уг тодӥськы. Ӵужанаелэн верамезъя, мон Татарстанысь Свияжск городын вордӥськемын. Анай-атае отысь нюлэс коранын ужаллям. Атае ужаз бырыны шедем. Соку монэ, тямыс толэзьем нылпиез, анае ӵужанай доры ваем. Берло секыт ужын анае но кулэм. Озьыен, мон ноку но анай-атай кылъёсты ӧй тоды. Куать аресам ӵужанаетэк но кыли. Соку монэ ӵужмуртэлэн семьяез ас бордаз басьтӥз. Ӟенгае туж умой вал. Солэсь ноку но урод кылзэ ӧй кылы. Соос доры лыктыкум, семьязы кылдэм гинэ вал на. Собере куинь нылпиоссы вордӥськизы. Соосын ваче одӥг анай-атайлэн нуныосыз кадь будӥм. Нырысь мыным дӥськут басьтозы вал. Ужын но, шутэтсконын но котьку ӵошен луим. Школаез йылпумъяса мукет пала дышетскыны пырыны малпанэ гинэ ӧз быдэсмы. Дасэтӥ классэз йылпумъян арын ӵужмуртэ кулӥз. Ӟенгайме огназэ нылпиосын кельтыны ӧй дӥсьты, коньдон ласянь но секытгес луиз», - малпанъёсыныз люкиське Тамара Яковлевна.

(Гареевъёслэн семьязы сярысь пыр-почгес лыдӟыны быгатоды газетмылэн 22-тӥ мае потэм номерысьтыз).