«Усточикар» лагерь нылпиослы ӧсъёссэ усьтӥз

Со 2003-тӥ арысен арлы быдэ радъяське ке но, туэ аспӧртэмгес ортче. 2024-тӥ арын Башкортостанысь удмуртъёслэн национально-культурной центрзы «Усточикар» лагерь понна нырысьсэ республикамылэн тӧроезлэсь грантсэ басьтӥз. Удмурт огазеяськонлы со азьпала бадӟым вамыш луиз.

Усточикар лагерь пӧртэм регионъёсысь удмурт кылэз гажась пиналъёсты люказ. Татын соосты чебересь кырӟанъёсын, вӧйен-нянен пумитазы. Лагерьын 21 нунал ӵоже нылпиосын Удмурт Элькунысь ӧнерчиос ужалозы. Нош вожатойёссы – Башкортостанысь но Удмуртиысь. Нырысетӥ нуналэ пиналъёс ог-огенызы, лагерьлэн куронъёсыныз тодматскизы. Нош туннэ соос «Усточикарез» усьтон ужрадэ дасясько. Со куинетӥ августэ 11.00 часын кутскоз.

#ГрантыРБ#ФСГОРБ#языкигранты2024

Людвиг Зидымаков, БР-ысь удмуртъёслэн НКЦ-енызы кивалтӥсь: «Лагерез усьтон понна вакчи дыр куспын бадӟым уж быдэстэмын. Сое радъяны юрттэмзы понна Татышлы ёрос администрацилы,  ёросысь дышетонъя ёзэтлы,  республикамылэн кивалтэтэзлы бадӟым тау шуиськом. Ми котьку шӧдӥськом, Башкортостанлэн тӧроез Радий Хабиров республикаысьтымы удмуртъёслы азинскыны паськыт луонлыкъёс кылдытэ шуыса».