Тупатӥськон ужъёс дыраз быдэстӥсько

Уго со Башкортостан Республикалэн тӧроезлэн Р. Хабировлэн кичӧлтэмезъя радъяське. Та нуналъёсы ёросэн кивалтӥсь культура юртын проект дасясьёсын но подрядной организациосын кивалтӥсьёсын кенешон ортчытӥз.

Кенешонын валтӥсь инты висъяськиз юртлэсь вылтуссэ тупатонлы, котырзэ утялтонлы но мукет та выллем ужъёслы. Ёрос администрациен кивалтӥсьлэн кылъёсызъя, татын вань ужъёс дыраз быдэстӥсько.

«Культура юртысь, историяя но культурая центрысь тупатӥськон ужъёс дыраз быдэстӥсько. Гурт калык чидатэк вите ни солэсь йылпумъяськемзэ. Выль Татышлыын улӥсьёс тодо, выльдэм культура юрт, историяя но культурая центр трос калыкез бордаз кыскоз шуыса», - гожтэ ёрос администрациен кивалтӥсь Фанур Шайхисламов.

- Башкортостанын удмуртъёс тросгес тямыс ёросъёсын уло, - вера Башкортостанысь Калыкъёслэн ассамблеязылэн кенешезлэн ёзчиез Салимьян Гарифуллин. – Шумпотӥсько, удмуртъёслэн историяя но культурая центрзы Татышлы ёросэ интыяськемын шуыса. Чылкак татын ортче пӧртэм регионъёсысь удмуртъёслэн «Дуно марӟанъёс» фестивальзы. Юртэз тупатыса быдтэмзы бере со выльысь трос ансамбльёсты огазеялоз.