Лагерьын данъяськоз удмурт кырӟан, удмурт эктон но удмурт кыл

Лагерь выжыкыл дуннее вуттэ

Туэ «Профильный лагерь для одаренных детей – удмуртов Усточикар «Город умельцев» Башкортостан Республикалэн тӧроезлэн грантэныз радъяське. Котькуд арын сямен ик татчы 100-лы матэ нылпиос люкаськозы. Куд-ог пиналъёс «Усточикаре» нырысетӥ арзэ гинэ уг вуо ни. Кылсярысь, Калтасы ёросысь Бадӟым Качак гуртысь Ульяна Вагапова но Ангелина Милитдинова удмурт лагере мыныны куинетӥ ползэ дасясько. Нылъёслэн кылъёссыя, «Усточикар»  удмурт нылпиосты огазеясь бадӟым коркалы пӧрмиз. Арлы быдэ со одӥг малпанэн улӥсь нылъёсты но пиосты чебер выжыкыл дуннее вуттэ, улонзэс яркытгес но шудогес каре. «Мон шумпотыса возьмасько «Усточикар»  сменаез. Лагерьын тодматскем эшъёсын ми кусыпез ум ыштӥське, чидатэк витиськом пумиськон нуналмес. «Усточикарын» нуналъёс шулдыр ортчо, вожатойёсмы но котьку синмаськымонэсь луо. Соослэн устолыксылы паймиськом, берло асьмеос но сыӵе ик луиськом», - вера Ульяна Вагапова.

«Усточикарлы» синмаськемын

Ангелина Милитдинова но «Усточикарлы» синмаськемын. «Лагерьын тодматскем эшъёсынымы телеграмын  нимысьтыз группа кылдытӥм. Туэ но ваньмы ӵош сменаын пумиськыны вераськиськом. «Усточикарысь» улонэз номырин но уд ӵошаты. Отын шулдыр, яркыт, капчи! Кылем арын «Киуж» ӧрын асме веръяй, туэ «Театр»-ын шудэме потэ. Оскисько, «Усточикар-2024» мон понна нош ик шудо но бурдъясь луоз», - малпанъёсыныз люкиське Ангелина.

*   *   *

Ӝоген «Усточикар» удмурт нылпиослы нош ик ӧсъёссэ усьтоз. Нош ик лагерьын шулдыр эшъяськон мылкыд кылдоз. Отын данъяськоз удмурт кырӟан, удмурт эктон, удмурт кыл!

Людвиг Зидымаков, Башкортостанысь удмуртъёслэн НКЦ-нызы кивалтӥсь: «Усточикар» лагерь аръёс ӵоже пӧртэм регионъёсысь  трос нылпиосты тодматӥз, эшъяськытӥз. Со Башкортостанысь удмуртъёслэн национально-культурной центрзылэн пиналъёс понна радъяськись ужрадъёсыз пӧлысь одӥгез бадӟымез луэ. Туэ лагерь нырысьсэ республикалэн тӧроезлэн грантэз улсын ортчоз.