Гуртлэн вуоноез егит семьяослэсь уте

- Бадӟымез пимы, Демид, куатетӥ классэ мынэ, Даниэль – кыкетӥе, нош Данэлия нылмы гуртысьтымы «Италмас» нылпи садэ ветлэ, - вера Е. Шайдуллина. – Куиньназы – куинь пӧртэмесь. Демид спортэн эшъяське ке, Даниэль творческой быгатонлыкъёсыныз висъяське. Солы суредаськыны, лэсьтӥськыны, пластилинэн ужаны кельше. Нош нылмылы котьма тунсыко, солэн ваньзэ тодэмез потэ. 

Елена Геннадиевналэн уж сюресэз нылпи дуннеен герӟаськемын. Со укмыс ар ини Шудекысь школаын дышетэ, история но обществознание предметъёсты нуэ. Со сяна, егит дышетӥсь директорлэн визьноданъя советникез но луэ.

Елена Геннадиевнаез ужъя эшъёсыз гажало. Нош дышетскисьёс лякыт сямо дышетӥсьсы сярысь шуныт кылъёсын гинэ вазисько.

- Дышетӥсь бадӟым улонэ шонер сюрес возьматэ. Со бадӟымъёсты гажан мылкыд пыӵатэ, матысьёсты яратыны дышетэ. Дышетӥсь котькуд дышетскисез борды аслэсьтыз люкетсэ пыртэ, шунытсэ сётэ. Та кылъёс Елена Геннадиевналы тупало. Ми туж шумпотӥськом, милемыз со дышетэ шуыса. Солы ваньмыз понна тау кариськом, - верало Шудек школаысь директорлэн советникез сярысь пиналъёс.

Дышетӥсьлэн ужез ноку уг быры, шуыны луоз. Солэн ужез дораз но бертэ. Озьы ке но ваньмон дырзэ Елена Геннадиевна семьяезлы сӥзе.

(Быдэсак лыдӟе газетмылэн 31-тӥ номерысьтыз).