Шаер сярысь сюлмаськыса, трос ужъёс быдэстӥсько

Со республикаысь, солэн палэназ выжы лэзем улосчиосты огъя ужен огазеян, гуртъёсты азинтон, отын улӥсь калыкез данъян вылысь кылдытэмын.

Вордскем шаерзы понна сюлмаськисьёс проект улсын трос ӟеч ужъёс быдэсто. «Атайсал» кылдэм дырысен отчы 5 600 адями пыриськем, 27541 проект ӵектэмын, со пӧлысь 26 875-ез быдэстэмын. «Атайсалэ» республикамылэн палэназ улӥсьёс но пыриськыны мылкыд каро: юрттэт вуэмын Якутиысь, Ханты-Мансийской округысь, Сочиысь, Тюмень улосвылысь но мукет интыосысь. Быдэстэм проектъёслы ваньзэ 1,4 млрд манет коньдон кошкем. «Котькуд адямилэн сюлэмызлы матын луись интыез вань. Отын со вордскиз, нырысетӥ вамышсэ лэсьтӥз, нырысетӥ кылзэ вераз. Со инты – вордӥськем шаер. Со асьмемыз адскисьтэм кужымен бордаз кыске, шунтэ, буйгатэ, - вера Радий Хабиров. – Ог-огмылы юрттон республикаын туннэ ӟеч сямлы пӧрмемын ни. Ми асьмелэнъёсты ум куштӥське».

Та проектъя лэсьтэм ужъёсты лыдэ басьтоно ке, висъясько Калтасы, Стерлитамак, Краснокама, Мелеуз, Аскино, Салават, Киги но Буздяк ёросъёс, Стерлитамак, Салават, Агидель но Нефтекамск городъёс. «Атайсал» проектлэн сайтаз пырыса, отын ӵектэм проектъёслэн пуштросэнызы тодматскыны луэ. Проектъёс категориослы люкылэмын. Кылсярысь, «События, мероприятия» категориын ужрадъёс, акциос, фестивальёс дасянын, ортчытонын спонсор юрттэт возьматӥське, нош «Иное» категорие пыртэмын книга поттон, гуртысь библиотекаослэсь фондзэс узырмытон, искусство но кино, литература но журналистика ӧръёсты азинтон но мукет.  

Проектэ азинлыко пыриськисьёсты кивалтэт синйылтытэк уг улы. Кылсярысь, инвожо толэзе Ермекей ёросын «Атайсал» улсын быдэстэм ужъёссы понна 14 адямиез Башкортостанлэн тӧроезлэн тау карон гожтэтэныз пусйизы. Соос пӧлын луиз Купченей гуртысь Геннадий Никитин но. Геннадий Данилович гуртсылэн 250 арезлы сӥзьыса, «Твои люди, село!» книга поттӥз.

Фото: Ермекеевские новости