Шуд доры нуись кузь сюрес

Калтасы ёросысь Кургак гуртысь Галина но Гафурьян Камаловъёслэн семьязылэн но улон сюрессы вӧй вылтӥ кадь ӧз кошкы. Кузпалъёслы капчилыкез шӧдон но валан понна трос тыршоно луиз.

Галина Гарипзяновнаез улон вешаса ӧз возьы. Жаляса верано, солы пичиысен улонлэсь секытсэ валано луиз. Калтасы ёросысь Бадӟым Туганеевоын вордскем ныл куинетӥ классэз йылпумъяса, анаез сьӧры Кургаке лыктӥз. «Мон аслэсьтым атайме уг тодӥськы. Куинетӥ классэз йылпумъям бере анай Кургаке бызиз. Мыным выль семьялы дышонэз капчи ӧй вал», - тодаз вайыса вера Галина апай.

Сизьыметӥ классэз йылпумъям нылаш тодмоосыз сьӧры Кзыл-Ордае кошкиз. Кузь сюрес вылэ потыны коньдонэз ӧй вал ке но, со берлань ӧз чигна. Егит ныллы сюрес вылэ потыны коньдон сётӥз бускельзы. Умоезлы оскыса, Галина апай тодмотэм шаере кошкиз.

Со вакытэ асьме палась Кзыл-Ордае но Казахстанысь мукет городъёсы трос калык кыстӥськиз. Егит нылъёс но пиос чебер, тыр улонэз утчаса, ӝутӥськон, рис октон, торф поттон ужъёсын тыршизы. Галина Гарипзяновна мурт шаере гудырикошконэ вуиз, эшеныз ӵош рис октон ужъёсы интыяськизы. Галина апай дышетскыны но тыршиз. Кзыл-Ордаын со штукатур-малярлы тодон-валан басьтӥз. Дышетсконзэ йылпумъяса, ӝутӥськон ужъёсы интыяськиз.

Мурт шаерын егит ныл улон сюрес вылэ йыг-йыг султӥз ке но, сюлэмыз вордскем палъёсаз ӧтиз. Отпусказ со котьку гуртаз вуылӥз. Анаез доры шутэтскыны бертыкуз вуоно кузпалыныз тодматскиз. Гафурьян Камалов тодматскем ӝытсэс туннэ нуналэз сямен тодэ на. «Мон армиысь бертэм вал. Ӝыт шудонэ потӥ. Отчы трос нылъёс вуиллям. Эшъёсылэсь тодӥ, нылъёс бускель гуртысь лыктӥллям шуыса. Соос пӧлысь Галинаез синйылтӥ. Сьӧд йырсиё, веськрес мугоро егит ныл сюлэмам соку ик каръяськиз. Одно ик мынам кузпалы луоз шуыса малпай», - пальпотыса вера Гафурьян агай.

Камаловъёс семья кылдытэмзы бере Казахстанэ кошкизы. Отын улонзы ас ӧрызъя радъяськиз ке но, сюлэмзы вордскем шаеразы кыстӥськиз. Озьы соос 1979-тӥ арын Кургаке берытскизы. Кузпалъёс пудо утён фермае ужаны интыяськизы. Галина апай пенсие потытозяз скал кыскиз, нош Гафурьян агай тракторен ужаз. Кургаке кузпалъёс Галина Гарипзяновналэн анаез доры бертӥзы. Пичи корказы нырысь укмыс кузя улӥзы. Нош 2000-тӥ арын кузпалъёс нылпиосынызы ӵош выль корказы улыны потӥзы. «Аслад коркад, аслад семьяеныд улонлы номыр но уз вуы», - шуо Камаловъёс.

Камаловъёслэн семьязы сярысь пыр-почгес лыдӟыны быгатоды газетмылэн 17-тӥ июле потэм номерысьтыз.