Музейын вашкала улон шока

Сое кылем арысь куарусёнэ гинэ усьтӥзы ке но, музей туж узыр адӟиське. Со удмурт калыклэсь ужез гажамзэ, вордӥськем шаереныз данъяськемзэ, лулчеберетсэ, сям-йылолъёсты утемзэ возьматэ.

Музейын вашкала улон шока, кожалод. Татын трос пӧртэм экспонатъёс асьсэлэсь интызэс шедьтӥллям. Музеен кивалтӥсь, школаысь ӟуч кылъя но литературая дышетӥсь Лариса Юрьевна Ямкаева соос пӧлысь котькудӥз сярысь дугдытэк вераны быгатоз. Экспонатъёсты люкан бордын соос быдэс гуртэн тыршиллям, трос люкет пыртӥллям пиналъёс но. Экспонатъёс пӧртэм экспозициосы люкылэмын. Татчы пырем бере ик син азям йӧтӥз вордскем шаермес утисьёслы сӥзем сэрег. Со «Неугасимая память поколений» нимаське. Экспозиция Быдӟым Атыкай оже, афган, чечен ожъёсы пыриськем пиослы сӥземын. Татын ик утисько Быдӟым Атыкай ожысь ветеранлэн, Рейхстагез басьтонэ пыриськем Раким Степанович Степановлэн орденъёсыз но медальёсыз.

Школаысь музейын вашкалаез но туалаез огазе пӧлэстӥське. Отчы ватӥськемын асьмелэн историмы. Выжыосмы понна куке но историе кылёз туала улонмы но.   

Музей сярысь пыр-почгес лыдӟыны быгатоды газетмылэн 26-тӥ инвожое потэм номерысьтыз.