Та удысын со 2020-тӥ арысен тырше. «Трос дыръя гуртъёстӥ кузпалыным машинаен ортчисько. Со вутскымтэ дыръя тулыс, гужем велосипедэн но ветлӥсько, – шуэ Мария Фанитовна.- Газетлы гожтӥськисьёслэн лыдзы берло дыре кулэсмиз. Кылсярысь, Утар-Елгаын нырысетӥ паларынын одӥг коркан гинэ газет басьтӥзы». Лыдӟисьёссэс ыштонтэм понна почтаын ужасьёс гурт калыкен юн кусып возё. Декада вакытэ вань кужымзэс, дырзэс соос гожтӥськон радъянлы сӥзё. «Лыдӟисьёс трос ке, ужаны мылкыд ӝутске», - вера М. Зидиярова.
Котькуд удысын выллем, почта ёзэтын ужасьёслэн но уж дуразы секытлыкъёссы пумисько. Кивалтэт соос азе вузъёсты вӧлмытонъя куронъёс но пуктэ. Почтаын ужасьёслэн малпамзыя, та уж соослы секытэн сётӥське, малы ке шуоно адями почтае электротыл, газ, интернет понна дун тырыны пыре, вуз басьтон малпанэн уг лыкты. «Почтаысь вузъёслы вакытэн-вакытэн акциос ялӥсько. Соку басьяськисьёс луо», - вера М. Зидиярова.
- Гожтэт, ӟечкылан открыткаос гожъясьёс туала дыре ӧвӧл ни, дыр, - юасько Мария Фанитовналэсь.
- Вань. Уд но оске, почта пыр гожтэтъёс, открыткаос ысто егитъёс. Выль ар азьын соос тужгес но трос луо, - вера почтальон. – Ужаны кутскон арын куд-ог солдатъёс но дорысьёссылы гожтэт гожъяло вал. Соосты шумпотыса адресатъёссылы вуттылӥ.