+28 °С
Салкым
Общество
26 Июне 2024, 17:09
Анай кылзэ усто дышетэмез вормонэ вуттӥз
Удмурт Элькунысь Кун Кенешлэн юртаз Россиысь калыкъёслэн анай кылъёссыя но литературая федерал олимпиадаын вормисьёсты но призёръёсты данъязы.
Анай кылзэ усто дышетэмез вормонэ вуттӥз
Соос пӧлын Удмурт Элькунлэн пӧртэм ёросъёсысьтыз но городъёсысьтыз, Татарстанысь но Башкортостанысь 16 дышетскисьёс луизы. Ужрадэ озьы ик вуылӥзы пиналъёслэн дышетӥсьёссы но.
Олимпиада 39 анай кылъёсъя радъяське. Удмурт нылпиос понна олимпиадаез ортчытонэз ас вылаз басьтӥз Глазовысь инженеръёсты но дышетӥсьёсты дасянъя В. Г. Короленко нимо университет. Туэ олимпиадалэн очной люкетаз 60 пинал пыриськыны быгатӥз.
Вормисьёсты Кун Кенешлэн тӧроезлэн воштӥсез Татьяна Ишматова, Глазовысь В.Г.Короленко нимо инженерияя но педагогикая университетлэн ректорез Янина Чиговская-Назарова, удмурт кылъя олимпиадалэн методикая ӧриезлэн кивалтӥсез, профессор Наталья Кондратьева ӟечкылазы.
Ужрадэ Татышлы ёросысь Кальтяево школаын 10-тӥ классын дышетскись Ксения Рахматуллина (дышетӥсез Л. А. Хазипова) но пыриськиз. Отысь со куинетӥ степенё медален бертӥз.
