Удмуртъёс "Гершыдын" шулдыръяськизы

Со Кит-Озеро гуртын радъяськиз. Гырон быдтон бере радъяськись ужрадэ Татарстанысь, Башкортостанысь, Удмуртиысь калык люкаськиз. Соосты трос пӧртэм ансамбльёс шулдыртӥзы. Шулдыръяськонлы аспӧртэм шӧм пыӵатӥз «Айкай» театр.  Праздникез удмуртъёслэн сям-йылолъёссылы сӥзем театрализованной представлениен усьтӥзы. Собере куноосты пумитаса вераськиз Бавлы ёрос администрациен кивалтӥсь Ильяс Гузаиров. 

- Ми Татарстанын улӥсь вань калыкъёслэсь лулчеберетсэс утьыны тыршиськом, - шуиз со. - Бавлы ёросын куинетӥ арзэ ни «Арбафест» фестиваль ортче. Туэ со "Гершыд" праздник улсын радъяське. Фестивале 200-лы матэ экипаж вуиз.

"Гершыд" празднике Башкортостанысь делегация но пыриськиз. Люкаськем калыкез республикаысьтымы удмурт калыкен, солэн культураеныз, осконэныз тодматӥзы Ермекей ёросысь Купченеевоысь «Зангари» ансамбль, Татышлы ёросысь Улысь Балтачысь Салимьян Гарифуллин но Евгений Адуллин, Бальзюгаысь Фридман Кабипянов, Выль Татышлыысь Юрий Нуриахметов. Пыр-почгес лыдӟыны быгатоды газетмылэн вуоно номерысьтыз.