Офицерлы буре ваён пул усьтӥзы

Можгаысь Александр Нуритдинов Шудекысь школаез 1983-тӥ арын йылпумъяз. Та вакытэ нокин ӧз малпа, аръёс ортчыса, кужмо спортсмензы, дышетскисьсы усто офицер луоз шуыса. Александр Фланевич 1984-тӥ арын Алма-Атаысь СССР-ысь КГБ-лэн высшей пограничной командной училищеезлэн курсантэз луэ – Анапаын Черноморской флотын  службазэ ортчемез бере.  Военной училище пыр потыса со Грузиысь Ахалцихе городын уж сюрессэ кутскиз. Со заставалэн кивалтӥсез но кинолог луиз. Дагестанэ, Армение, Азербайджанэ командировкаосы трос пол вуылӥз.

1993-тӥ арын воинской частьсэ Ставрополь шаерысь Будённовск городэ выжтӥзы. Кык ар ортчыса городысь одӥгзэ эмъюртэз Шамиль Басаев но солэн боевикъёсыз басьтӥзы. Удмурт офицер но соослы пумит кышкатэк султӥз. Та аре ик со РФ-ысь Федеральной пограничной службая Академие дышетскыны пыриз. Со бӧрсьы офицерез Калининградэ, ФСБ-лэн пограничной институтаз выжтӥзы. Татын со дышетыны кутскиз. Нош 2004-2012-тӥ аръёсы Александр Нуритдинов Екатеринбургын ФСБ-лэн институтаз ужаз.

Александр  Фланевичлэн улон сюресэз туж вакчи ке но луиз, со – данъяськымон. 24-тӥ куартолэзе Шудек школаын со сярысь трос шуныт кылъёс чузъяськизы. Та нуналэ ужрадэ вуэмъёс но улосчизы сярысь трос выльзэ тодӥзы, дыр. Кузпалыз Лариса Галимовна, сузэрез Анюта Фланевна офицерлэн уж сюресэныз тодматӥзы, солэн вордӥськем шаерзэ гажамез сярысь веразы.

Шудек школаысь музейын Александр Фланевичлы сӥзем сэрег дасямын. Со «Учитель. Воин. Патриот» нимаське. Отчы интыязы буре ваён пулэз но. Татын бадӟым инты висъяське офицерлэн дӥськутэзлы. Сое музее подполковниклэн кузпалыз кузьмаз. Нош палэнынгес Александр Фланевичлэн туспуктэмез. Со гуртысь пиналъёс шоры лякыт синъёсыныз учке но соосты дор музъемзэс гажаны куре кадь.