Кыкназылы одӥг улон

Ог-огдэ валаса но гажаса, ог-огедлы юрттыса но пыкет луыса улон кык адямиосты огазея. Ӵошен лэсьтэм котькуд пичи вамыш семьяез бадӟым но кужмо каре. Угось бадӟым шуръёс но пичи ошмесъёстэк кужымзэс ышто,  семьяос  но пичи вамышъёслэсь кылдо.

Янаул ёросысь Сандугач гуртысь Зинира но Дмитрий Адиевъёслэн семьязы котыр ласянь учкымон шуи ке, уг янгыша, дыр. Соослэн вераськемазы но, ог-огзы шоры учкемъёсазы но гажан мылкыд шӧдӥське.

Соослэн семьязы 1987-тӥ арын кылдӥз. Дмитрий Адиев кема аръёс ӵоже Мичурин нимо колхозэн кивалтӥсез машинаен нуллӥз, нош кузпалыз хозяйствоын ик бухгалтерын тыршиз. Семьяязы куинь нылпиоссы вордӥськизы. Туннэ нуналэ соос ваньзы интыяськемын ини, котькудӥз аслаз улон сюрестӥз йыг-йыг вамышъя. Со сяна, кузпалъёслэн кык нунокъёссы но будо, гужемез песяй-песятайзы дорын ортчыто.

 «Ог-огмес али но егитэсь кадь потӥськом. Улонлы шумпотыса, азьланезлы оскыса улӥськом. Ортчем сюресмы шудо вал, азьланьын эшшо но тунсыкоез возьма, дыр. Угось котькуд адями улонзэ ас киынызы лэсьтэ, ми но ӟечсэ но чеберзэ гинэ адӟыны тыршиськом», - шуо Адиевъёс.

Йыг-йыг вамышъясьлы сюрес капчи потэ. Нош улон сюрестӥ ӵошен ваче ки кутскыса мынӥсьёслы номыр кышкыт ӧвӧл. Соос  - семья, соос – кужым!

(Адиевъёслэн семьязы сярысь пыр-почгес лыдӟыны быгатоды газетмылэн вуоно номерысьтыз)