Калтасы ёросын кинофестиваль ортчиз

Кӧня ке ар талэсь азьвыл татын «Кванториум» мобильной технопарк ужаз. Соку тодмо луиз, школаысь нылпиослэн короткометражной фильм дасяны мылкыдзы вань шуыса. Вакчи дыр куспын соос ньыль ужзэс йылаз-пумаз вуттыны быгатӥзы. Пиналъёс асьсэос сценарий гожтӥзы, видео уськытӥзы, монтаж лэсьтӥзы, крезьгур бырйизы… Нош кинофестивале ёросысь школаослэн медиа-студиосынызы 22 короткометражной фильм дасямын вал. Соослэсь ужъёссэс дунъяны татчы «Киноуроки в школах России  и мира» проектлэн Башкортостан Республикая кураторез Азамат Тимиргазин, «Кванториум Башкортостана» мобильной технопарклэн наставникез Марат Бакиров вуизы. Кинофестивальын «Киноуроки», «Анимационная студия» но «Мама, я – актёр» тематической площадкаос ужазы.

Кинофестивальын устооссэ актёръёсты, сценарий гожтӥсьёсты но мукетъёсты нимысьтыз дипломъёсын пусйизы. Шумпотыса верано, пӧртэм номинациосын вормисьёс пӧлын удмурт пиналъёс но, дышетӥсьёс но луизы шуыса. Краснохолмскийысь кыкетӥ номеро школаын дышетскись Кирилл Ильбаев, кылсярысь, «Лучшая мужская роль» номинациын вормисе потӥз. Нош солэсь командазэ «Лучшая операторская работа» номинациын данъязы. Краснохолмскийысь куинетӥ номеро школаысь логопед Л. В. Файзуллинаез «Лучшая женская роль второго плана» номинациын данъязы, Карина нылызлэн командаез «Лучший сценарий и режиссура» номинациын вормиз.