Нылпиослэн олимпи шудонзы волейболэн йылпумъяськиз

Одӥгаз Выль Татышлыысь но Вуж Варашысь командаос (котькудӥз понна ньыль пи но кык ныл шудӥз)  шудонэз усьтӥзы, мукетаз – Бадӟым Качакысь но Сандугачысь. Шудонъёсын кужмогес луизы Татышлы но Калтасы ёросъёсысь командаос. Та нуналэ асьсэлэн подгруппаосазы соослы вуисьёс ӧз луэ. Озьыен, олимпиадаын нырысетӥ инты понна шудонын Бадӟым Качакысь но  Выль Татышлыысь командаос шудӥзы. Со куинь партиен кыстӥськиз. Нырысетӥяз Татышлы ёросысь команда вормиз, нош кыкетӥяз Калтасы ёросысь куноослы удалтӥз. Соин куинетӥ партиын учкисьёс но, тренеръёс но площадкаосысь нылъёсын но пиосын ӵош шудӥзы, кожалод. Зэмзэ верано ке, волейболъя ӵошатскон кутскемлэсь азьвыл ик татын тросэз вормон понна соос куспын нюръяськон пуромоз шуыса малпало вал. Озьы ке но нокин ӧз тоды, площадкаын кин кужмогес луоз. Туэ олимпиадаын Бадӟым Качакысь нылъёс но пиос вормонзэс пусйизы. Нош Выль Татышлыысь команда кыкетӥ интыын луиз. Куинетӥ инты понна Бадӟым Гондырысь но Вуж Варашысь командаос пумиськизы. Вуж варашъёс татын зол кужымзэс возьматӥзы. Бадӟым Гондырысь команда понна шудӥсь нылъёс но пиос дырын-дырын шудонын вормонлы осконзэс но ыштӥзы кадь. Озьы ке но соос куинетӥ интызэс утьыны быгатӥзы.