Дунне вылын мед луоз ог-огдэ валан

Со понна бадӟым тау ож вакытэ шаермес утисьёслы – песяй-песятайёслы, ӵужайӵужатайёслы. Тылын гомась кунмес утён огазеяз пӧртэм калыкъёсты. Соос асьмелы шудо улон кузьман понна улонзэс, тазалыксэс жалятэк тыршизы. Со сярысь верало соослэн Дунне вылын мед луоз ог-огдэ валан кисыриен гырем бамъёссы, кышкытлыкъёсты адӟем муресь синъёссы. Ми соослы туннэ музъемозь йыбырттӥськом.

Туннэ озьы ик шудо улон понна нюръясько асьмелэн пиосмы – мобилизованнойёс, доброволецъёс, военнойёс. Вормон Нуналэз соос ож лудын, киязы ожтӥрлыкъёсын пумиталозы. Соослы сэзь, йӧно луыны, ваньзэ чиданы-вормыны сӥзиськом. Оскиськом, матысь дыре шаермес утисьёс вордскем палъёсазы Вормонэн берытскозы. Жаляса верано, нимысьтыз военной операция кутскем дырысен республикамы трос пиоссэ ыштӥз. Соослэн нимъёссы ноку уз вунэ, котьку калык пӧлын улозы.

Гажано эшъёс! Сӥзиськом тӥледлы ваньзэ ӟечсэ, чеберзэ. Улон медаз жаля яркыт буёлъёссэ. Кытын яркыт буёл, отын задор мылкыд но тазалык луэ угось. Семьяяды, куспады мед луоз ог-огдэ гажан. Чагыр инвис но яркыт шунды мед пиштозы азьпалан. Вормон Нуналэн!