Копейка понна сюлдэ кыскозы

Тодмо таксистэн вераськыку, микрозайм басьтон сярысь кылпум потӥз. Вадим (нимыз воштэмын) уйпалан ужа: одӥг толэзь телевизор, компьютер азьын уд пукы шуыса, со огарня шутэтскемез бере, таксие потэ.

- Кыӵе гинэ адямиосты уд пумитаськы, кыӵе гинэ югдуре адямиос уг шедё – таксистлэн мӧзмыны дырыз ик ӧвӧл, - вера Вадим. – Вань мынам одӥг тодмое. Саша (нимыз воштэмын) но уйпалан ужа. Бертыкуз мон сое вокзалын пумитасько, кошкыкуз – келясько. Тодмоелы уждунзэ бертэм бераз кык-куинь нуналскын гинэ, пе, выжто. Доре саламъёстэк, кузьымтэк кызьы бертод шуыса, со микрозайм басьтэ. Уждунэз выжем бере ик, пунэмзэ берыктэ. Берло бертыкуз олокӧня интые вуим, «ӝог коньдон» сётъян интыосын сое «узырмыты» ӧз дыртэ. «Тон туннэ коньдон басьтӥськод но куинетӥ нуналаз берен ваиськод. Милемлы сыӵе клиентъёслэсь пайда ӧвӧл», - шуиз солы одӥгез коньдон сётъян висъетысь кышномурт. Саша тышкаськыны но вутскиз, номыр ӧз воштӥськы. «Уждунэ выжем бере, нылпиосыным магазинэ пото ини», - тӧлпери кадь выремез бере буйгатскиз со.

- Иське, микрозайм сётъян интыын ужасьёс сыӵе адямиосты быръё, кинъёс пунэмзэс дыраз тырыны уз быгатэ. Асьсэос ик со адямилы нуналаз сю пол но жингыртозы, дыр. Копейка понна сюлдэ кыскозы, - лулӟыса шуиз Вадим.