Шудзэс тупаса улон но нылпиоссы бордысь адӟо

Кузпалъёслэн ужан аръёссы «Дэмен» хозяйствоен герӟаськемын. Соос кыкназы но гуртысьтызы фермаын ужазы, азьветлӥсьёс радын луизы. Соослэн ужзы таукаронъёсын, грамотаосын пусъемын. Садртдиновъёс сярысь гожъямъёсты 2006-2007-тӥ аръёсы пӧсьтолэзе, коньывуонэ, шуркынмонэ потэм «Республика Башкортостан» газетлэн номеръёсысьтыз но лыдӟыны луэ. Со сяна, кузпалъёслэн ӟеч ужамзы сярысь «Татышлинский вестник» газетэ но гожъязы. Со газетъёс Садртдиновъёслэн семейной архивазы туспуктэмъёсынызы ӵош возисько. Фагим Хазипович туннэ но быръем удысаз тырше, «Дэменлэн» Уразгильдыысь фермаяз ветлыса ужа.

- Дырлэсь ортчемзэ шӧдыса но уд вуы, макем ӝог ортчо аръёс! Кожалод, толон гинэ вал кадь егит, задор, жадёнэз валатэк ужаны ветлэм дырыд. Туннэ со аръёс яркыт кизили выллем тодэ ваёнъёсын гинэ уло. Фермаын ужам аръёс ноку уз вунэ, - вера Дуня Ивановна. – Башкортостанлэн нырысетӥ Президентэз Муртаза Рахимов но Бальзюгае вуылӥз, фермаын ужасьёсын пумиськылӥз. Соку «Дэмен» СПК-ен Ренат Биктимирович Галямшин кивалтӥз. Хозяйствомы ёросамы гинэ ӧвӧл, республикаысь кужмо хозяйствоос пӧлын лыдъяськиз. Бальзюга фермаын ужасьёс со дыре трос йӧл кыскеменызы висъяськизы.

Садртдинов кузпалъёс уж сюрессэс Пермь шаерысь Чернушка ёросын кутскиллям. Отын но соос гурт удысын тыршиллям. Кузпалъёс спорт ужрадъёсы но мыло-кыдо пыриськиллям. Дуня апай туннэ кадь тодэ «Дэмен» понна куасэн бызьылыны, капчи атлетикая ӵошатсконъёсы вуылэмзэ, отысь вормонъёсын бертэмзэ. «Ужаны но, шутэтскыны но, конкурсъёсы, ӵошатсконъёсы пыриськыны но вутскиськом вал», - вера Д. Садртдинова.

Котькуд семьяын выллем, Дуня апаен Фагим агайлэн улоназы но пӧртэм дыръёссы луиллям. Куамын тямыс ар ӵоже ни соос шумпотонъёссэс но, шуг-секытъёссэс но шори люко, котьку ог-огзылы кужмо пыкет луо. Ӵошен ортчем улон сюрессэс кузпалъёс шудоен лыдъяло.

- Анай-атай понна тужгес бадӟым шуд – со нылпиос, соос тазаесь, шудоесь мед луозы, - вера Дуня апай.

(Быдэсак лыдӟе газетмылэн 14-тӥ номерысьтыз).