Гурт улонзэс городлы ӧз воштэ

2010-тӥ арысен артэ вамышъясь кузпалъёслэн куинь нылпиоссы будо. Иван пизы куатетӥ классын дышетске, Варвара – куинетӥын. Нош ньыль аресъем Вера гуртысьтызы нылпи садэ ветлэ. Манаповъёслэн семьяязы куинь поколение тупаса улэ. Кузпалъёс Димлэн анаеныз ӵош уло. Рима Пукроковна соослэн котьма ласянь тыбыр пыкетсы, пе, луэ.

- Семьямы кылдыку, ми кыкнамы но Бирскын дышетскиськом вал. Нылпиосмы ӧй вал на. Озьы ке но городэ улыны кылён малпанмы ӧз луы, - вера М. Манапова. – Кылем арысен гуртамы газификация кутскиз. Юртъёсы газ пыриз ке, улонмы трослы капчигес луоз. Соин ми азьланяз но гуртын улыны малпаськом.

Мария Олеговна ӟуч кылъя но литературая дышетӥсьлы тодон-валан басьтэм. Уж сюрессэ со Татышлы ёросысь Арибашысь школаын кутскем. Али М. Манапова Выль Татышлыысь шор ёзо школаын библиотекарь луыса ужа.

- Бускель гуртэ ветлоно ке но, уж дурам шумпотыса вуисько. Нылпиослы пӧртэм ужрадъёс ортчытъяны кельше, - шуэ Мария Олеговна. Библиотекарез пиналъёслэн лыдӟиськымтэзы сюлмаськытэ. «Библиотекае книгалы пырасьёс туж ӧжыт», - вера со.

Мариялэн кузпалыз кӧня ке ар ини Вылысь Татышлые ветлыса ужа. Дим Хасфатович нырысь Россиысь ДОСААФ-лэн Вылысь Татышлыысь ёзэтаз ужаз. Али со Татышлы ёросысь электросете электромонтёр луыса ужаны интыяськиз,

Манаповъёслэсь семьязэс пӧртэм ужрадъёсысь пумитаны луэ. Соос нылпиосынызы ӵош школаын ортчись ӵошатсконъёсы, шудонъёсы пыриськон сяна, гуртсы, гурт поселенизы понна но ӵошатско.

- Валля арын Улысь Балтачын «Трезвое село» республика конкурс улсын «Территория трезвости» регионъёс куспысь форум ортчиз. Отын пӧртэм площадкаос ужазы. Спортлы сӥзем площадкаын пӧртэм гуртъёсысь семьяос понна «Мама, папа, я – спортивная семья» ӵошатскон радъяськиз. Отчы ми но пыриським, - вера Мария Олеговна.

Ӵошатсконысь Манаповъёс куинетӥ интыен бертӥзы. Со сяна, 2022-тӥ арын соос Башкортостанысь удмуртъёслэн национально-культурной центренызы радъям «Шудо семья» республика конкурсэ пыриськизы. Отын республикаысь егит удмурт семьяос кужымзэс мертазы. Конкурсын Манаповъёсты «Вашкала сям-йылолъёсты утисьёс» номинациен пусйизы. Вераны кулэ, нылпиосыныз, внукъёсыныз ӵош ужрадъёсы Рима Пукроковна но пыриське. Кылсярысь, 2016-тӥ арын БР-ысь удмуртъёслэн историяя но культурая центренызы радъям «Шундыберган» конкурсэ со Варвараен пыриськиз. Соку кышномурт жингрес куараен кырӟаменыз котькинэ паймытӥз. Бальзюгаос пӧлын но гуртозылэсь сокем шулдыр кырӟаны быгатэмзэ тодӥсьтэмъёс вань вылэм. Рима апай ИКЦ бордысь «Эшъяськон тугоко» клублэн ёзчиез но луэ.

- Анаймы ваньмон дырзэ киужъёслы сӥзе, - шуэ Мария. – Со керттӥське, вуриськыны яратэ. Удмурт калык дӥськутъёс но быгатыса вуре. Варваралы дорысь ужъёссэ быдэсъяны но куд-ог дыръя юрттэ.

Варвараен Ваня дорысьёссэс умой оценкаосынызы шумпотто. Соос олимиадаосы, пӧртэм конкурсъёсы ӵем пырисько. Варвара эктыны яратэ. Соин сое анай-атаез арняяз кык пол Вылысь Татышлыысь искусствоосъя школае нулло.

- Ванялы математика качиен сётӥське. Школаын дышетскисьёслэн быдэсросси олимпиадазылэн школьной этааз вормыса, со мунициал этапе пыриськиз. Отын призёр луиз, - шумотонзэ ватытэк вера Мария.

Ваньмон дырзэс Манаповъёс семьяенызы ортчыто. Гужем кыре потало. Ӵемысь пӧртэм шур дуръёсы вуыло. Дим Хасфатович чорыганэн тунсыкъяське угось. Нош толалтэ соос куас вылэ султо. Ӵошен шумпото инкуазьлэн чеберезлы, шумпото, ваньзы огазе люкаськыса, шутэтскыны быгато шуыса. Семья адямилэн улоназ бадӟым инты басьтэ угось. Со бордын улонмы возиське.