+18 °С
Салкым
Антитеррор
Вань иворъёс
Общество
1 апрель , 22:05

Нылпиос Уфаен тодматскизы

Каникул нуналъёсы Янаул ёросысь Вуж Варяш гуртысь шор ёзо школаын дышетскись нылпиос Уфае экскурсиен вуылӥзы.

Нылпиос Уфаен тодматскизы
Нылпиос Уфаен тодматскизы

Пиналъёслэн Уфаен тодматскон нуналзы «ВДНХ-ЭКСПО» Башкириысь выставочной компаниялэн площадкаысеныз кутскиз. Ӵапак соку республикамылэн шоркараз «Агрокомплекс-2024» калыккуспо специализированной возьматон  усьтӥськемын вал. Та выллем агропромышленной форум туэ 34-тӥ ползэ радъяське ини. Возьматонэ 50 огазеяськонъёсын 180 котыр техника ваемын. Со сяна, нимысьтыз площадкаын 50 фермер хозяйствоос асьсэ ужзылэсь емышъёссэ возьматӥзы.

Экскурсие вуэм нылпиос выль техникалэн руль сьӧраз пуксьыса учкизы, беспилотникъёсын ужаса эскеризы, пӧртэм мастер-классъёсы пыриськылӥзы. Озьы ик пиналъёс вож изъёслэсь выставкаен тодматскизы. Кылсярысь, татын малахит, изумруд, александрит, демантоид, уваровит, змеевик, верделит, нефрит, жадеит, хризопраз, хризолит возьматэмын вал.

Та нунуалэ ик Вуж Варяш шор ёзо школаысь нылпиос Ботанической садэ но пыраны вутскизы. Татын соос пальма, магнолия, кактус, банан но мукет будосъёс сярысь трос выльзэ тодӥзы.

Нылпиослэн каникул нуналъёссы оло огшоры ортчысал, Уфае мыныны соослы «Колхоз Восток» СПК-лэн кивалтӥсез Олег Валиханович Зайнуллин юрттэт ӧй возьматысал ке. Солэн тыршеменыз но экскурсиез радъяны коньдон висъяменыз, школаын дышетскисьёс трос выльзэ тодӥзы, ветлымтэ интыосазы вуылӥзы. Дышетӥсьёс, пиналъёс но соослэн анай-атайёссы хозяйствоен кивалтӥсьлы тау кылъёссэс верало но солы юн тазалык сӥзё.

Фото: МБОУ СОШ с. Старый Варяш

 

Автор:Венера Ильбаева
Читайте нас: